مولانا فضل الرحمن کے خلاف وائرل ایف آئی آر جعلی ہے، قصور پولیس

قصور: سوشل میڈیا پر جمعیت علمائے اسلام (ف) کے سربراہ مولانا فضل الرحمن کے خلاف تھانہ صدر قصور میں مقدمہ درج ہونے کی گردش کرنے والی خبر کو پولیس نے جعلی قرار دے دیا ہے۔

ایس ایچ او تھانہ صدر ذوالفقار بھٹی کے مطابق سوشل میڈیا پر وائرل ایف آئی آر کا تھانے کے ریکارڈ سے کوئی تعلق نہیں۔ انہوں نے بتایا کہ وائرل ایف آئی آر میں درج نمبر 1807 تھانے کے ریکارڈ کے مطابق غلط اور غیر متعلقہ ہے۔

انہوں نے مزید کہا کہ ایف آئی آر میں جس تفتیشی افسر اے ایس آئی قمر کا نام درج کیا گیا ہے، اس نام کا کوئی اہلکار تھانہ صدر قصور میں تعینات نہیں۔

پولیس نے شہریوں سے اپیل کی ہے کہ غیر مصدقہ اور جعلی دستاویزات پر یقین نہ کریں اور معلومات کی تصدیق کے بعد ہی انہیں آگے شیئر کریں۔