اسلحہ لائسنسوں کی کمپیوٹرائزیشن میں بے ضابطگیوں کا انکشاف

کوئٹہ: بلوچستان میں اسلحہ لائسنسوں کی کمپیوٹرائزیشن کے عمل میں مبینہ بے ضابطگیوں کا انکشاف ہوا ہے۔ آڈٹ رپورٹ کے مطابق ہزاروں ایسے اسلحہ لائسنس سامنے آئے ہیں جن کی حیثیت مشکوک قرار دی گئی ہے۔

رپورٹ میں بتایا گیا ہے کہ 9 ہزار 291 اضافی مشکوک اسلحہ لائسنسوں کا سراغ لگایا گیا، جبکہ وزارت داخلہ کی جانب سے جاری کیے گئے لائسنسوں کے مقابلے میں نادرا کے ریکارڈ میں کمپیوٹرائزڈ لائسنسوں کی تعداد زیادہ نکلی۔

آڈٹ رپورٹ کے مطابق ایک لاکھ 86 ہزار سے زائد اسلحہ لائسنس کمپیوٹرائز کیے گئے، جن میں سے 10 ہزار 464 لائسنس بعد ازاں جعلی قرار دیے گئے۔

رپورٹ میں مزید انکشاف کیا گیا ہے کہ ممنوعہ بور کے 44 ہزار 250 لائسنس کمپیوٹرائز کیے گئے، جبکہ اصل تعداد 36 ہزار 497 تھی، جس پر سوالات اٹھائے گئے ہیں۔

آڈٹ رپورٹ میں اسلحہ لائسنسوں کے ریکارڈ، تصدیقی عمل اور کمپیوٹرائزیشن کے نظام میں بہتری کی ضرورت پر زور دیا گیا ہے۔