،زرعی پانی کی فراہمی یقینی بنانے کے لیے عملی اقدامات، کاشتکاروں میں اطمینان

گنداخہ: (نامہ نگار فریداحمد ) صوبائی وزیر لائیو اسٹاک بلوچستان سردارزادہ فیصل خان جمالی کی خصوصی ہدایات پر میر ضرار ناصر خان جمالی نے محکمہ ایریگیشن کے اعلیٰ افسران کے ہمراہ کھیرتھر کینال سے نکلنے والی مختلف ذیلی شاخوں کا تفصیلی دورہ کیا اور زرعی پانی کی منصفانہ، شفاف اور بروقت تقسیم کو یقینی بنانے کے لیے موقع پر ہی ضروری اقدامات کیے۔شدید گرمی اور تپتی دھوپ کے باوجود میر ضرار ناصر خان جمالی مختلف نہری شاخوں پر پہنچے، جہاں انہوں نے پانی کی صورتحال، بہاؤ اور تقسیم کے نظام کا جائزہ لیا،اس موقع پر انہوں نے محکمہ ایریگیشن کے افسران کو ہدایت کی کہ تمام علاقوں کے کاشتکاروں کو ان کے مقررہ حصے کے مطابق پانی فراہم کیا جائے، غیر قانونی واٹر کورسز اور پانی کی چوری کی روک تھام کو یقینی بنایا جائے اور کسی بھی شکایت کا فوری ازالہ کیا جائے،میر ضرار ناصر خان جمالی نے کاشتکاروں اور زمینداروں سے ملاقاتیں بھی کیں، ان کے مسائل تفصیل سے سنے اور یقین دہانی کرائی کہ صوبائی وزیر سردارزادہ فیصل خان جمالی کی ہدایت پر زرعی پانی کی فراہمی کے نظام کی مسلسل نگرانی کی جا رہی ہے تاکہ کسی بھی علاقے کے آبادگار کو پانی کی کمی کے باعث مشکلات کا سامنا نہ کرنا پڑے۔ انہوں نے کہا کہ زراعت ملکی معیشت کی ریڑھ کی ہڈی ہے اور کاشتکاروں کے مفادات کا ہر صورت تحفظ حکومت کی اولین ترجیح ہے،دورے کے دوران محکمہ ایریگیشن کے افسران نے بھی پانی کی تقسیم اور جاری اقدامات سے متعلق بریفنگ دی، جبکہ متعدد مقامات پر موقع پر ہی عوامی شکایات کا ازالہ کرنے کے احکامات جاری کیے گئے۔دریں اثنا عوامی، سماجی، کسان اور زمیندار حلقوں نے صوبائی وزیر لائیو اسٹاک سردارزادہ فیصل خان جمالی اور میر ضرار ناصر خان جمالی کی عوام دوست پالیسی اور عملی نگرانی کو سراہتے ہوئے کہا کہ شدید گرمی میں خود نہری علاقوں کا دورہ کرکے کاشتکاروں کے مسائل سننا اور ان کے حل کے لیے فوری اقدامات کرنا قابلِ تحسین اقدام ہے۔ انہوں نے امید ظاہر کی کہ ان عملی کاوشوں سے زرعی پانی کی منصفانہ تقسیم یقینی ہوگی، زرعی پیداوار میں اضافہ ہوگا اور علاقے کے آبادگاروں کو خاطر خواہ ریلیف ملے گا۔