زیارت میں تھانے پر دہشت گرد حملہ، پولیس اہلکار شہید، احتجاجاً قومی شاہراہ بند

زیارت: بلوچستان کے ضلع زیارت کے علاقے کچ میں دہشت گرد حملے کے بعد صورتحال کشیدہ ہو گئی، جہاں مسلح افراد نے مقامی تھانے پر حملہ کیا۔

ذرائع کے مطابق حملے کے دوران متعدد پولیس اہلکاروں کو اغوا کیا گیا، جن میں سے 15 اہلکاروں کی شہادت کی اطلاعات سامنے آئی ہیں، جبکہ دیگر اہلکاروں کے بارے میں معلومات حاصل کی جا رہی ہیں۔ سرکاری حکام کی جانب سے واقعے کی مکمل تفصیلات اور شہداء کی تعداد کی تصدیق کا انتظار ہے۔

واقعے کے خلاف شہداء کے لواحقین اور مقامی افراد نے احتجاج کرتے ہوئے زیارت کراس کے مقام پر قومی شاہراہ بلاک کر دی، جس کے باعث بلوچستان، خیبرپختونخوا، پنجاب اور اسلام آباد جانے والی ٹریفک متاثر ہوئی اور مسافروں کو مشکلات کا سامنا کرنا پڑا۔

سیکیورٹی اداروں نے علاقے کو گھیرے میں لے کر سرچ آپریشن شروع کر دیا ہے، جبکہ حملے میں ملوث عناصر کے خلاف کارروائی جاری ہے۔ حکام کا کہنا ہے کہ ذمہ داروں کو قانون کی گرفت میں لایا جائے گا۔

دوسری جانب واقعے پر عوامی و سیاسی حلقوں کی جانب سے شدید تشویش کا اظہار کرتے ہوئے دہشت گردی کے خاتمے اور امن و امان کی بہتری کے لیے مؤثر اقدامات کا مطالبہ کیا گیا ہے۔