مستونگ اور قلات کے درمیان فلاحی ادارے کی ایمبولینس نامعلوم مسلح افراد لے گئے

کوئٹہ: ذرائع کے مطابق پنجگور کے فلاحی ادارے سنگت فاؤنڈیشن کی ایک ایمبولینس کو مستونگ اور قلات کے درمیان نامعلوم مسلح افراد اپنے ساتھ لے گئے ہیں۔

ذرائع کا کہنا ہے کہ واقعہ پیش آنے کے بعد متعلقہ اداروں کو آگاہ کر دیا گیا ہے، تاہم تاحال ایمبولینس اور اس کے بارے میں مزید تفصیلات سامنے نہیں آ سکیں۔

یہ واقعہ ایسے وقت میں پیش آیا ہے جب تین روز قبل بلوچستان یونیورسٹی آف انجینئرنگ اینڈ ٹیکنالوجی کی ایک ایمبولینس بھی قلات کے علاقے سے نامعلوم مسلح افراد اپنے ساتھ لے گئے تھے۔

مقامی ذرائع کے مطابق قلات اور ملحقہ علاقوں میں فلاحی اور سرکاری اداروں کی گاڑیوں کو نشانہ بنائے جانے کے حالیہ واقعات نے تشویش پیدا کر دی ہے۔ عوامی حلقوں نے متعلقہ حکام سے مطالبہ کیا ہے کہ واقعات کی تحقیقات کرکے ایمبولینسوں کی بازیابی کو یقینی بنایا جائے۔

واقعے کے حوالے سے سرکاری سطح پر مزید تفصیلات اور موقف کا انتظار ہے۔