عید پر پرامن ماحول فراہم کرنے کیلئے تمام وسائل بروئے کار لائے جائینگے,ایس ایس پی پشین

ایس ایس پی پشین کیپٹن (ر) نوید عالم نے کہا ہے کہ عیدالاضحیٰ کے موقع پر شہریوں کے جان و مال کے تحفظ کے لیے جامع سیکیورٹی پلان تیار کر کے شہر کے داخلی و خارجی راستوں سمیت حساس مقامات پر اسنیپ چیکنگ کا عمل سخت کر دیا گیا ہے۔ یہ بات انہوں نے پاکستان ٹیلی وڑن کے سینئر پروڈیوسر “کرنٹ افیئرز ٹائم” ملک محب ترین کی قیادت میں ملاقات کے لیے آنے والے صحافیوں کے وفد سے گفتگو کرتے ہوئے کہی۔ ملاقات میں ضلع میں امن و امان کی مجموعی صورتحال اور بالخصوص عیدالاضحیٰ کے موقع پر کیے جانے والے سیکیورٹی انتظامات پر تفصیلی تبادلہ خیال ہوا۔ ایس ایس پی کیپٹن (ر) نوید عالم نے بتایا کہ عید گاہوں، مساجد اور مویشی منڈیوں کی سیکیورٹی کے لیے پولیس کے اضافی دستے تعینات کردیئے گئے ہیں۔ عید کے ایام میں اسٹریٹ کرائمز کی روک تھام کے لیے پولیس موبائلز اور موٹر سائیکل اسکواڈ کا گشت بھی بڑھا دیا گیا ہے تاکہ کسی بھی ناخوشگوار واقعے سے بچا جا سکے۔ انہوں نے کہا کہ امن و امان کے قیام اور افواہوں کے سدباب کے لیے میڈیا کا تعاون ناگزیر ہے۔ عوام کی جان و مال کا تحفظ پولیس کی اولین ترجیح ہے اور عید کے پرمسرت موقع پر شہریوں کو پرامن ماحول فراہم کرنے کے لیے تمام دستیاب وسائل بروئے کار لائے جائیں گے۔ ایس ایس پی نے شہریوں سے بھی اپیل کی کہ وہ مشکوک افراد اور سرگرمیوں کی فوری اطلاع پولیس کو دیں تاکہ بروقت کارروائی ممکن ہو سکے۔