کسانوں کی خوشحالی کیلئے آبپاشی نظام کو مزید مؤثر بنایا جا رہا ہے، کمشنر نصیرآباد

کسانوں کی خوشحالی کیلئے آبپاشی نظام کو مزید مؤثر بنایا جا رہا ہے، کمشنر نصیرآباد
موجودہ حکومت کی جانب سے کاشتکاروں کے وسیع تر مفاد میں اقدامات کا سلسلہ جاری ہے، کمشنر نصیرآباد ڈویڑن صلاح الدین نورزئی نے مین پٹ فیڈر کینال سمیت دیگر ذیلی شاخوں میں زرعی پانی کی سالانہ بندش کے موقع پر جاری ترقیاتی کاموں کا تفصیلی جائزہ لیا۔ ایگزیکٹو انجینئر پٹ فیڈر کینال فرید احمد پندرانی نے بیدار کے مقام پر بریفنگ دیتے ہوئے بتایا کہ وزیر اعلیٰ بلوچستان میر سرفراز بگٹی، چیف سیکرٹری شکیل قادر خان، صوبائی وزیر آبپاشی میر محمد صادق عمرانی اور صوبائی سیکرٹری آبپاشی سہیل الرحمن بلوچ کی ہدایات کی روشنی میں پٹ فیڈر کینال اور اس کی مختلف ذیلی شاخوں بالان شاخ، قیدی شاخ، مگسی شاخ اور عمرانی شاخ سمیت دیگر نہروں پر تعمیر و مرمت اور بھل صفائی کا کام تیزی سے جاری ہے جس کی مسلسل اور کڑی نگرانی کی جا رہی ہے تاکہ نظام آبپاشی کو مزید موثر بنایا جا سکے۔ کمشنر نصیرآباد ڈویڑن صلاح الدین نورزئی نے اس موقع پر ہدایت کی کہ تمام جاری حکومتی اقدامات کو بہتر انداز میں بروئے کار لایا جائے اور کام کے معیار پر کوئی سمجھوتہ نہ کیا جائے تاکہ آئندہ خریف سیزن میں بوائی کے دوران کاشتکاروں کو بروقت اور منصفانہ بنیادوں پر زرعی پانی کی فراہمی ممکن بنائی جا سکے، انہوں نے مزید کہا کہ زراعت ملکی معیشت کی ریڑھ کی ہڈی ہے اور کسانوں کو درپیش مسائل کا حل حکومت کی اولین ترجیح ہے، اس سلسلے میں آبپاشی نظام کی بہتری کے لیے تمام دستیاب وسائل بروئے کار لائے جا رہے ہیں تاکہ علاقے میں زرعی پیداوار میں اضافہ ہو اور کاشتکار خوشحال ہوں۔