لکی مروت میں پولیس کا ٹارگٹڈ آپریشن، 2دہشتگرد ہلاک، اہلکار شہید

لکی مروت کے سرحدی علاقے میں پولیس کے ٹارگٹڈ آپریشن کے دوران دو دہشت گرد ہلاک جبکہ ایک بہادر پولیس اہلکار شہید ہوگیا۔

پولیس کے مطابق کارروائی اخوندان کے جنگلات میں خفیہ اطلاعات پر کی گئی، جہاں فتنۃ الخوارج سے تعلق رکھنے والے دہشت گردوں کے ساتھ شدید فائرنگ کا تبادلہ ہوا۔ مقابلے کے دوران دہشت گرد جنگلات کا فائدہ اٹھاتے ہوئے اپنے زخمی ساتھیوں کو ساتھ لے کر فرار ہونے میں کامیاب ہوگئے۔

حکام کا کہنا ہے کہ ہلاک دہشت گردوں میں ایک کی شناخت انتہائی مطلوب کمانڈر عامر سہیل عرف عقابی عرف عمر خطاب کے نام سے ہوئی ہے، جو ٹارگٹ کلنگ، سیکیورٹی فورسز پر حملوں اور بم دھماکوں سمیت متعدد سنگین مقدمات میں مطلوب تھا۔

فائرنگ کے تبادلے میں پولیس جوان عتیق الرحمٰن نے جرات و بہادری کی مثال قائم کرتے ہوئے جامِ شہادت نوش کیا۔

ڈی پی او لکی مروت نذیر خان کے مطابق علاقے میں وسیع پیمانے پر سرچ آپریشن جاری ہے، جبکہ پولیس دہشت گردی کے مکمل خاتمے اور امن و امان کے قیام کے لیے پرعزم ہے۔