’’عید کا چاند دیکھنے کیلیے اُلٹی مشین ‘‘ عدالت میں سماعت کے دوران دلچسپ ریمارکس

عید کا چاند دیکھنے کے حوالے سے مقدمے کی سماعت کے دوران دلچسپ ریمارکس سامنے آئے۔

ہائیکورٹ کے چیف جسٹس سرفراز ڈوگر نے عید کا چاند دیکھنے کے بعد جلدی اعلان کرنے کی درخواست پر سماعت کی۔ اس موقع پر درخواست گزار عبد اللہ شفیق ذاتی حیثیت میں عدالت کے روبرو پیش ہوئے۔

سماعت کے دوران چیف جسٹس نے دریافت کیا کہ کیا نوٹس سے پریشانی تو نہیں ہوئی، جس پر عبد اللہ شفیق نے نفی میں جواب دیا۔ درخواست گزار نے مؤقف اختیار کیا کہ چاند دیکھنے والی مشین اُلٹی لگی ہوئی تھی۔

عدالت میں درخواست گزار کا کہنا تھا کہ میرے پاس اس حوالے سے ویڈیو موجود ہے جو موبائل میں محفوظ ہے۔ انہوں نے مزید کہا کہ جمعے کی عید تھی مگر رویت ہلال کمیٹی نے ہفتے کو عید کروائی۔

چیف جسٹس نے استفسار کیا کہ مشین الٹی ہونے سے کوئی نقصان ہوا؟، جس پر درخواست گزار نے حدیث کا حوالہ دیا گیا اور کہا کہ مذہبی امور نے بھی جواب جمع نہیں کروایا، لہذا مستقبل کے لیے اس درخواست کو نمٹا دیں۔

چیف جسٹس نے ریمارکس دیے کہ آپ اس حدیث کی تفصیلات عدالت میں پیش کردیں۔بعد ازاں عدالت نے استدعا منظور کرتے ہوئے کیس نمٹا دیا۔