اسلام آباد: مولانا عبدالغفور حیدری کو دل کا دورہ پڑنے کے باعث گزشتہ شب اسپتال منتقل کر دیا گیا، جہاں ان کا علاج جاری ہے۔
جمعیت علمائے اسلام پاکستان کی جانب سے جاری بیان میں کہا گیا ہےکہ مولانا عبدالغفور حیدری کو اچانک طبیعت ناساز ہونے پر فوری طور پر اسلام آباد کے ایک نجی اسپتال لے جایا گیا، جہاں ڈاکٹروں نے معائنہ کرنے کے بعد دل کا دورہ پڑنے کی تصدیق کی۔
بیان میں کہا گیا ہے کہ انہیں ماہر ڈاکٹروں کی نگرانی میں رکھا گیا ہے اور ضروری ٹیسٹ کیے جا رہے ہیں تاکہ ان کی صحت کی مکمل جانچ کی جا سکے،مولانا عبدالغفور حیدری کی حالت اس وقت مستحکم بتائی جا رہی ہے ڈاکٹروں نے انہیں مکمل آرام کا مشورہ دیا ہے، معالجین ان کی مسلسل مانیٹرنگ کر رہے ہیں اور آئندہ 24 سے 48 گھنٹے نہایت اہم قرار دیے جا رہے ہیں۔
اسپتال میں مختلف سیاسی و مذہبی شخصیات نے ان کی عیادت کی، جن میں مولانا فضل الرحمان، کامران مرتضیٰ اور دیگر رہنما شامل تھے۔ رہنماؤں نے ان کی جلد صحت یابی کے لیے دعا کی اور ڈاکٹروں سے علاج کے حوالے سے تفصیلات بھی حاصل کیں۔
پارٹی رہنماؤں نے کارکنان اور عوام سے اپیل کی ہے کہ وہ مولانا عبدالغفور حیدری کی صحت یابی کے لیے خصوصی دعائیں کریں۔ بیان میں کہا گیا کہ وہ ملک کی مذہبی و سیاسی قیادت میں ایک اہم مقام رکھتے ہیں اور ان کی خدمات طویل عرصے پر محیط ہیں۔
