تعلیمی اداروں کی بحالی اور معیارِ تعلیم میں بہتری اولین ترجیح ہے، طارق عزیز مگسی

گنداواہ (نامہ نگار)ڈسٹرکٹ آفیسر ایجوکیشن جھل مگسی طارق عزیز مگسی سے پریس کلب گنداواہ کے صحافیوں کے وفد نے ملاقات کی۔ وفد نے انہیں عہدے کا چارج سنبھالنے پر مبارکباد پیش کی اور نیک خواہشات کا اظہار کیا۔
اس موقع پر ڈسٹرکٹ آفیسر ایجوکیشن جھل مگسی طارق عزیز مگسی نے گفتگو کرتے ہوئے کہا کہ ضلع جھل مگسی میں تعلیمی اداروں کی بحالی، تعلیمی معیار میں بہتری اور طلبہ کو بہتر تعلیمی سہولیات کی فراہمی کے لیے بھرپور اقدامات کیے جا رہے ہیں۔ انہوں نے کہا کہ سرکاری تعلیمی اداروں میں بنیادی سہولیات کی فراہمی، اساتذہ کی حاضری یقینی بنانے اور تعلیمی نظام کو مزید فعال و مؤثر بنانے کے لیے تمام دستیاب وسائل بروئے کار لائے جائیں گے۔
انہوں نے مزید کہا کہ تعلیم کسی بھی معاشرے کی ترقی اور خوشحالی میں بنیادی کردار ادا کرتی ہے، اس لیے تعلیمی شعبے میں درپیش مسائل کو ترجیحی بنیادوں پر حل کرنا ہماری اولین ذمہ داری ہے۔ اساتذہ اور محکمہ تعلیم کے افسران کو اپنی ذمہ داریاں احسن طریقے سے ادا کرنے کی ہدایات جاری کی جائیں گی تاکہ طلبہ کو معیاری تعلیم کی فراہمی یقینی بنائی جا سکے۔