بلوچستان اسمبلی میں آج سرداری نظام کے خاتمے کی اہم قرارداد پیش کی جائے گی

بلوچستان اسمبلی کے آج ہونے والے اجلاس میں صوبے میں صدیوں پرانے سرداری نظام کے خاتمے کے حوالے سے ایک انتہائی اہم اور غیر معمولی قرارداد پیش کی جائے گی۔

تفصیلات کے مطابق بلوچستان اسمبلی کے رکن مولانا ہدایت الرحمن بلوچ کی جانب سے یہ تحریک اسمبلی میں لائی جا رہی ہے، جس میں مطالبہ کیا گیا ہے کہ صوبے میں سرداری نظام کا مکمل خاتمہ کیا جائے اور سرکاری و عوامی سطح پر ’’نواب‘‘ اور ’’سردار‘‘ کے القابات بولنے اور لکھنے پر باقاعدہ پابندی عائد کی جائے۔

مجوزہ قرارداد کے متن میں مؤقف اختیار کیا گیا ہے کہ صوبے کے تمام شہریوں کو آئین اور قانون کے تابع بنایا جائے اور طاقتور طبقے کی سرکاری سرپرستی کا سلسلہ ختم کیا جائے۔ قرارداد میں تمام شہریوں کے مساوی حقوق اور قانون کی حکمرانی کو یقینی بنانے پر زور دیا گیا ہے۔