پیٹرولیم لیوی کے خاتمے پر حکومت اور جماعت اسلامی کی مذاکراتی ٹیموں کا اجلاس طے

پیٹرولیم لیوی کے خاتمے کے معاملے پر وفاقی حکومت اور جماعت اسلامی کی مذاکراتی ٹیموں کے درمیان اہم اجلاس طے پا گیا ہے۔

تفصیلات کے مطابق وفاقی وزیر منصوبہ بندی احسن اقبال نے نائب امیر جماعت اسلامی پاکستان لیاقت بلوچ سے ٹیلیفون پر رابطہ کیا۔ اس رابطے کے دوران پیٹرولیم لیوی کے خاتمے اور عوام کو درپیش معاشی مشکلات کے حل کے لیے دونوں جانب کی مذاکراتی کمیٹیوں کے اجلاس پر اتفاق کیا گیا۔

نائب امیر جماعت اسلامی لیاقت بلوچ کے مطابق حکومتی اور جماعت اسلامی کی مذاکراتی کمیٹیوں کا مشترکہ اجلاس 23 اکتوبر کو اسلام آباد میں منعقد ہوگا، جس میں وزیراعظم شہباز شریف اور امیر جماعت اسلامی حافظ نعیم الرحمن کی جلد ملاقات کی تاریخ بھی حتمی کی جائے گی۔

لیاقت بلوچ نے گفتگو کرتے ہوئے واضح کیا کہ 23 اکتوبر کو پیٹرول لیوی ٹیکس کے خاتمے کے لیے ملک بھر میں پُرامن احتجاجی مظاہرے کیے جائیں گے۔ انہوں نے زور دیا کہ عوام کو حقیقی ریلیف کی فراہمی اور معاشی پہیہ چلانے کے لیے حکومت کے ساتھ مذاکرات اور پُرامن احتجاج کا عمل ساتھ ساتھ جاری رہے گا۔