لائبہ ستار کے مبینہ اغوا کا نوٹس، وزیر داخلہ بلوچستان نے 24 گھنٹے میں رپورٹ طلب کرلی

کوئٹہ: وزیر داخلہ بلوچستان میر ضیاء اللہ لانگو نے قلات کی رہائشی لائبہ ستار کے مبینہ اغوا کے واقعے کا نوٹس لیتے ہوئے متعلقہ حکام سے تفصیلی رپورٹ طلب کرلی ہے۔

وزیر داخلہ نے ایڈیشنل سیکرٹری داخلہ کو ہدایت کی ہے کہ واقعے سے متعلق تفصیلی رپورٹ 24 گھنٹے کے اندر پیش کی جائے۔

اس سلسلے میں ڈی آئی جی پولیس قلات ڈویژن، ڈپٹی کمشنر قلات اور ڈی پی او قلات کو بھی ضروری ہدایات جاری کردی گئی ہیں۔

میر ضیاء اللہ لانگو نے کہا کہ خواتین سمیت ہر شہری کا تحفظ حکومت کی اولین ترجیح ہے۔ متعلقہ حکام واقعے سے متعلق حقائق سامنے لانے اور ضروری اقدامات کے لیے اپنی ذمہ داریاں مؤثر انداز میں ادا کریں۔

واضح رہے کہ واقعے سے متعلق حتمی حقائق اور مزید تفصیلات متعلقہ حکام کی رپورٹ کے بعد سامنے آئیں گی۔