سہیل آفریدی کا لانگ مارچ ’شارٹ ٹرم مارچ‘ بن چکا، جو دہشتگردوں کے حق میں ہو رہا ہے، عظمیٰ بخاری

لاہور: وزیر اطلاعات پنجاب عظمیٰ بخاری نے وزیراعلیٰ خیبر پختونخوا سہیل آفریدی کے لانگ مارچ کو تنقید کا نشانہ بناتے ہوئے اسے ’’شارٹ ٹرم مارچ‘‘ قرار دیا ہے۔

اپنے بیان میں عظمیٰ بخاری نے الزام عائد کیا کہ یہ مارچ دہشت گردوں کے حق میں کیا جا رہا ہے۔ ان کا کہنا تھا کہ خیبر پختونخوا میں ایک جانب دہشت گردی کے واقعات پیش آ رہے ہیں، جبکہ دوسری جانب سہیل آفریدی کنٹینر پر سوار ہو کر مارچ کر رہے ہیں۔

انہوں نے کہا کہ یہ مارچ نہ بانی پی ٹی آئی کے حق میں ہے اور نہ ہی پختون عوام کے مفاد میں۔ ان کے مطابق صوبے میں سیکیورٹی کی صورتحال تشویش ناک ہے، لیکن مارچ کے شرکا سڑکوں پر سرگرم ہیں۔

وزیر اطلاعات پنجاب کا کہنا تھا کہ سیکیورٹی فورسز عوام کے تحفظ کے لیے قربانیاں دے رہی ہیں، جبکہ سہیل آفریدی ان فورسز پر تنقید کرتے اور دہشت گردوں کے حوالے سے نرم مؤقف اختیار کرتے ہیں۔

عظمیٰ بخاری نے مزید الزام لگایا کہ پی ٹی آئی کی سینئر قیادت کو ایک ’’کنٹینر باز‘‘ نے یرغمال بنا رکھا ہے۔ انہوں نے کہا کہ خیبر پختونخوا دہشت گردی سے متاثرہ صوبہ ہے اور وہاں کی پولیس اور عوام کی قربانیاں ناقابلِ فراموش ہیں۔

انہوں نے دعویٰ کیا کہ صوبے کے عوام پی ٹی آئی کی حکومت سے نجات چاہتے ہیں، جبکہ سوشل میڈیا پر مصنوعی ذہانت (AI) سے تیار کردہ ویڈیوز بھی شیئر کی جا رہی ہیں۔