شمالی وزیرستان میں سیکیورٹی فورسز کا انٹیلی جنس بیسڈ آپریشن، 7خارجی ہلاک

پشاور: شمالی وزیرستان میں سیکیورٹی فورسز نے انٹیلی جنس بیسڈ آپریشن کے دوران فتنۃ الخوارج سے تعلق رکھنے والے 7 دہشت گردوں کو ہلاک کردیا، کارروائی کے دوران بھاری مقدار میں اسلحہ اور گولہ بارود بھی برآمد ہوا۔

سیکیورٹی ذرائع کے مطابق شمالی وزیرستان میں فتنۃ الخوارج کے خلاف مؤثر کارروائیاں کی گئیں، جن کے دوران دہشت گردوں کے متعدد ٹھکانے بھی تباہ کیے گئے۔

ذرائع کا کہنا ہے کہ یہ کارروائیاں عزمِ استحکام وژن کے تحت جاری آپریشنز کا حصہ ہیں، جبکہ خیبر پختونخوا میں دہشت گردی کے خلاف کارروائیاں جاری ہیں۔

صدرِ مملکت آصف علی زرداری، وزیراعظم شہباز شریف، وفاقی وزیر داخلہ محسن نقوی اور دیگر سیاسی رہنماؤں نے کارروائی میں 7 دہشت گردوں کی ہلاکت پر سیکیورٹی فورسز کو خراجِ تحسین پیش کیا۔

صدرِ مملکت نے کہا کہ دہشت گردوں کے غیر ملکی سرپرستوں اور مقامی سہولت کاروں کی سازشوں کو ناکام بنایا جائے گا، جبکہ محسن نقوی کا کہنا تھا کہ دہشت گردی کے خاتمے کے لیے پوری قوم سیکیورٹی فورسز کے ساتھ کھڑی ہے۔