خطے میں کشیدگی؛ 42 پروازیں منسوخ، کئی تاخیر کا شکار، ہزاروں مسافر پریشان

لاہور: مشرقِ وسطیٰ میں کشیدگی کے باعث پاکستان کا فضائی آپریشن متاثر ہوگیا، ملک کے مختلف ایئرپورٹس سے 42 پروازیں منسوخ جبکہ 68 پروازیں 2 سے 7 گھنٹے تک تاخیر کا شکار ہوگئیں، جس کے باعث ہزاروں مسافروں کو مشکلات کا سامنا ہے۔

ایئرپورٹ ذرائع کے مطابق سعودی عرب اور دیگر خلیجی ممالک کی صورتحال کے باعث پروازوں کے شیڈول میں خلل پڑا۔ منسوخی اور تاخیر سے سب سے زیادہ مشکلات سعودی عرب جانے والے عمرہ زائرین کو پیش آرہی ہیں۔

ذرائع کے مطابق لاہور کے علامہ اقبال انٹرنیشنل ایئرپورٹ سے 13 پروازیں منسوخ اور 12 تاخیر کا شکار ہوئیں، جبکہ کراچی ایئرپورٹ سے 10 پروازیں منسوخ اور 13 کی آمد یا روانگی میں تاخیر ہوئی۔

اسلام آباد ایئرپورٹ پر 9 پروازیں منسوخ اور 8 تاخیر کا شکار ہوئیں، جبکہ ملتان ایئرپورٹ سے بھی 7 پروازیں منسوخ ہونے کی اطلاعات ہیں۔

دوسری جانب مشرقِ وسطیٰ کی صورتحال کے پیش نظر پاکستان انٹرنیشنل ایئرلائنز (پی آئی اے) نے ریاض کے لیے اپنا فضائی آپریشن عارضی طور پر معطل کردیا ہے۔

پی آئی اے کے ترجمان نے مسافروں سے اپیل کی ہے کہ ایئرپورٹ روانہ ہونے سے قبل اپنی پرواز کی تازہ صورتحال جاننے کے لیے کال سینٹر 111-786-786 پر رابطہ کریں۔ ترجمان نے پروازوں میں خلل کے باعث مسافروں کو پیش آنے والی زحمت پر معذرت بھی کی ہے۔