سہیل آفریدی کا پچھلی حکومت میں ‘مارچ فکسڈ ‘ سے متعلق بیان ، علی امین سیخ پا، پارٹی کے واٹس ایپ گروپ کا آڈیو میسج لیک

پشاور: وزیراعلیٰ خیبر پختونخوا سہیل آفریدی کے گزشتہ حکومت میں مارچ کو ’’فکسڈ‘‘ قرار دینے سے متعلق بیان پر سابق وزیراعلیٰ علی امین گنڈاپور برہم ہوگئے، جبکہ پارٹی کی پارلیمانی پارٹی کے واٹس ایپ گروپ میں بھیجا گیا ان کا آڈیو پیغام لیک ہوگیا۔

لیک آڈیو پیغام میں علی امین گنڈاپور نے کہا کہ انہوں نے ابتدا میں مذاق میں پیغام بھیجا تھا، تاہم بعد میں خیال آیا کہ یہ لیک ہوکر میڈیا پر چل سکتا ہے۔ ان کے بقول، اس طرح کی غیر ذمہ دارانہ باتیں اور رویہ مناسب نہیں۔

علی امین گنڈاپور نے کہا کہ ان کے پاس بھی بہت سی باتوں کا ریکارڈ موجود ہے اور اگر وہ سامنے لے آئے تو کئی لوگ بے نقاب ہوجائیں گے۔

انہوں نے کہا کہ وہ بانی پی ٹی آئی اور پارٹی کی خاطر خاموش ہیں، تاہم استعمال کی گئی زبان میں سنگین الزام لگایا گیا ہے۔

سابق وزیراعلیٰ نے مزید کہا کہ انہیں ہر شخص کے رویے اور احسان فراموشی کا علم ہے، لیکن ہر بات کی ایک حد ہوتی ہے اور انسان کو اتنا ہی کہنا چاہیے جتنا وہ برداشت کرسکے۔

علی امین گنڈاپور نے واضح کیا کہ وہ اس طرح کی باتیں برداشت نہیں کریں گے اور متعلقہ افراد کو مشورہ دیا کہ دوسروں پر تنقید کرنے کے بجائے اپنی کارکردگی پر توجہ دیں۔