عظمیٰ خان اور نورین نیازی کو کپڑے، دوائیاں دیں، باہر جا کر کہا کچھ نہیں دیا، لاہور ہائیکورٹ

لاہور: لاہور ہائیکورٹ نے بانی پی ٹی آئی عمران خان کی بہنوں علیمہ خان، عظمیٰ خان اور نورین نیازی کی نظر بندی کے خلاف درخواستوں پر سماعت کرتے ہوئے جیل میں ادویات، کپڑوں اور دیگر بنیادی سہولیات سے متعلق رپورٹ طلب کرلی۔

جسٹس عبہر گل خان نے علیمہ خان کے بیٹے شاہ ریز کی درخواست پر سماعت کی، جس میں درخواست گزار کی جانب سے وکیل رانا مدثر عمر پیش ہوئے۔

سماعت کے دوران عدالت نے ریمارکس دیے کہ کپڑے اور ادویات فراہم کیے گئے، لیکن باہر جا کر کہا گیا کہ کچھ نہیں دیا گیا۔ وکیل نے مؤقف اختیار کیا کہ عدالتی حکم کے باوجود 19 روز گزرنے پر بھی مطلوبہ ادویات اور کپڑے فراہم نہیں کیے گئے۔

وکیل رانا مدثر عمر نے عدالت سے استدعا کی کہ عظمیٰ خان اور نورین نیازی کو ادویات، کپڑے، کتابیں اور دیگر بنیادی ضروریات فراہم کرنے کا حکم دیا جائے۔

جسٹس عبہر گل خان نے کہا کہ مطلوبہ اشیا کی فہرست تحریری طور پر دی جائے تاکہ عدالت اسی کے مطابق حکم جاری کرسکے۔ عدالت نے واضح کیا کہ کھانے پینے کی اشیا فراہم کرنے کی اجازت نہیں دی جاسکتی، تاہم دیگر درخواستوں پر رپورٹ طلب کی جا رہی ہے۔

وکیل نے نظر بندی کے خلاف مرکزی درخواست پر بھی سماعت کی استدعا کی، جس پر عدالت نے کہا کہ پہلے ادویات اور کپڑوں کی فراہمی کا معاملہ حل کیا جائے۔

عدالت نے سہولیات سے متعلق رپورٹ طلب کرتے ہوئے علیمہ خان، عظمیٰ خان اور نورین نیازی کی نظر بندی کے خلاف درخواستوں پر مزید کارروائی 12 اکتوبر تک ملتوی کردی۔