حوثیوں کیخلاف اپنی فوج کسی دوسرے ملک کی سرزمین پر نہیں بھیجیں گے؛ ترکیہ

انقرہ: ترکیہ نے واضح کیا ہے کہ سعودی عرب کے ساتھ دفاعی معاہدے کے باوجود وہ یمن میں حوثیوں کے خلاف کارروائی کے لیے اپنی فوج کسی دوسرے ملک کی سرزمین پر نہیں بھیجے گا۔

ترک وزیر خارجہ حاقان فیدان نے انقرہ میں ہنگری کے وزیر خارجہ کے ساتھ مشترکہ پریس کانفرنس میں کہا کہ سعودی عرب، پاکستان اور ترکیہ کے درمیان طے پانے والا مکہ مشترکہ دفاعی معاہدہ دفاعی نوعیت کا ہے، اسے جارحانہ کارروائیوں کے لیے استعمال نہیں کیا جائے گا۔

انہوں نے کہا کہ معاہدے میں شامل کسی ایک ملک پر حملہ ہونے کی صورت میں دیگر رکن ممالک اس کے دفاع میں ساتھ دیں گے، تاہم ترکیہ کسی دوسرے ملک کی سرزمین پر حملے کے لیے اپنی فوج نہیں بھیجے گا۔

حاقان فیدان کے مطابق ترک اور سعودی فوجی حکام سعودی عرب کی دفاعی ضروریات کا جائزہ لے رہے ہیں۔ فضائی دفاع، برقی جنگی صلاحیتوں اور تکنیکی معاونت سمیت مختلف شعبوں میں تعاون کے امکانات پر بھی غور کیا جارہا ہے۔

رائٹرز کے مطابق ترکیہ سعودی عرب کو دفاعی سازوسامان اور تکنیکی معاونت سمیت مختلف شعبوں میں مدد فراہم کررہا ہے۔

خبر کے مطابق ترکیہ، پاکستان اور سعودی عرب نے اگست میں مکہ مشترکہ دفاعی معاہدے پر دستخط کیے تھے، جس کے تحت ایک رکن پر مسلح حملے کو تمام ارکان پر حملہ تصور کیا جائے گا۔ تاہم معاہدے کی ترکیہ کی پارلیمنٹ سے توثیق ابھی باقی ہے۔

یہ بیان ایسے وقت سامنے آیا ہے جب سعودی عرب کو حوثیوں کی جانب سے حملوں کے خدشات کے تناظر میں اپنے دفاعی تعاون کو مزید مضبوط بنانے کی کوششوں کا سامنا ہے۔