بھارت میں 13 کروڑ ووٹرز کے نام خارج ہونے کا معاملہ بین الاقوامی میڈیا کی شہ سرخیوں میں آ گیا

نئی دہلی: بھارت میں ووٹر فہرستوں سے 13 کروڑ سے زائد نام خارج کیے جانے کا معاملہ عالمی میڈیا کی توجہ حاصل کرنے لگا ہے، جبکہ اپوزیشن جماعتوں اور مظاہرین نے انتخابی عمل کی شفافیت پر سوالات اٹھاتے ہوئے چیف الیکشن کمشنر سے استعفے کا مطالبہ کردیا ہے۔

برطانوی اخبار دی ٹیلی گراف کی رپورٹ کے مطابق ووٹر فہرستوں سے خارج کیے گئے ناموں کی تعداد میکسیکو کی مجموعی آبادی سے بھی زیادہ ہے۔

اس معاملے پر بھارت میں سیاسی کشیدگی بڑھ رہی ہے اور اپوزیشن رہنما راہول گاندھی سمیت مختلف حلقوں کی جانب سے احتجاج کیا جارہا ہے۔

رپورٹ کے مطابق اپوزیشن اور ناقدین کو خدشہ ہے کہ ووٹر فہرستوں سے بڑے پیمانے پر نام خارج ہونے سے بالخصوص مسلمان ووٹرز متاثر ہوسکتے ہیں۔ ناقدین یہ بھی خدشہ ظاہر کررہے ہیں کہ اس عمل سے حکمران جماعت بھارتیہ جنتا پارٹی (بی جے پی) کو سیاسی فائدہ پہنچ سکتا ہے۔ تاہم یہ خدشات اور الزامات ہیں، جن پر انتخابی عمل کی شفافیت سے متعلق بحث جاری ہے۔

مظاہرین چیف الیکشن کمشنر گنیش کمار سے مستعفی ہونے کا مطالبہ کررہے ہیں۔ ان کا مؤقف ہے کہ ووٹر فہرستوں سے ناموں کا اخراج محض انتظامی معاملہ نہیں بلکہ شہریوں کے حقِ رائے دہی اور جمہوری نظام کے تحفظ سے جڑا اہم سوال ہے۔

نئی دہلی، ممبئی اور بنگلورو میں احتجاج کے بعد 10 اکتوبر کو نئی دہلی کے جنتر منتر پر مزید مظاہروں کی توقع ظاہر کی گئی ہے۔