آئی ایم ایف کا پیٹرول سبسڈی محدود کرنے اور توانائی اصلاحات پر زور

اسلام آباد: عالمی مالیاتی فنڈ (آئی ایم ایف) نے پاکستان پر پیٹرولیم سبسڈی محدود کرنے، مہنگی فیول اسکیموں کو ختم کرنے اور توانائی کے شعبے میں اصلاحات تیز کرنے پر زور دیا ہے۔

آئی ایم ایف کے مطابق پیٹرولیم مصنوعات پر سبسڈی عام صارفین کے بجائے صرف مستحق افراد کو فراہم کی جانی چاہیے، جبکہ تیل کی قیمتوں میں اضافے کے دوران مالی معاونت محدود مدت اور مخصوص طبقات تک رکھی جائے۔

فنڈ نے مہنگی اور وسیع پیمانے پر فراہم کی جانے والی فیول سبسڈی میں مزید توسیع سے گریز کرنے کی تجویز بھی دی ہے۔

اعلامیے کے مطابق پاکستان میں جولائی 2025 سے مارچ 2026 کے دوران معاشی شرح نمو 4 فیصد رہی، تاہم مشرق وسطیٰ کے بحران کے اثرات کے باعث سالانہ شرح نمو کم ہوکر 3.6 فیصد رہنے کا امکان ظاہر کیا گیا ہے۔

رپورٹ کے مطابق مئی 2026 میں مہنگائی بلند ترین سطح پر پہنچ گئی، جبکہ بیرون ملک پاکستانیوں کی ترسیلات زر نے کرنٹ اکاؤنٹ خسارے کو قابو میں رکھنے میں مدد فراہم کی۔

آئی ایم ایف نے توانائی کے شعبے میں واجبات کی وصولی بہتر بنانے، گیس کے نقصانات کم کرنے، پیداواری لاگت گھٹانے اور توانائی کی قیمتوں میں بروقت ردوبدل کی ضرورت پر بھی زور دیا ہے۔

فنڈ کے مطابق اسٹیٹ بینک کو مہنگائی پر قابو پانے کے لیے محتاط اور مناسب حد تک سخت مالیاتی پالیسی برقرار رکھنی چاہیے، جبکہ زرمبادلہ کے ذخائر میں اضافے کے لیے بھی اقدامات ضروری ہیں۔