ایران جنگ ختم کرنا چاہتا ہے تو اسے جوہری یورینیم افزودگی کم کرنی ہو گی، جے ڈی وینس

واشنگٹن: امریکی نائب صدر جے ڈی وینس نے کہا ہے کہ ایران اگر جنگ کا خاتمہ اور امریکا کے ساتھ کوئی معاہدہ چاہتا ہے تو اسے اپنی جوہری یورینیم افزودگی کی صلاحیت میں بامعنی کمی کرنا ہوگی۔

ایک خبر رساں ادارے کو انٹرویو دیتے ہوئے جے ڈی وینس نے کہا کہ امریکا ایران سے محض زبانی یقین دہانیوں کے بدلے اقدامات قبول نہیں کرے گا، تہران کو اپنے جوہری پروگرام کے حوالے سے ٹھوس اور قابلِ تصدیق اقدامات کرنا ہوں گے۔

امریکی نائب صدر کا کہنا تھا کہ اگر ایران جوہری ہتھیار تیار کرنے کا ارادہ نہیں رکھتا تو اسے 60 فیصد تک افزودہ یورینیم تیار کرنے کی ضرورت کیوں ہے؟ ان کے مطابق ایران کو اپنے مؤقف کا عملی ثبوت اپنی جوہری افزودگی کی صلاحیت میں نمایاں کمی کی صورت میں دینا ہوگا۔

جے ڈی وینس نے کہا کہ امریکا اب بھی ایران کے ساتھ معاہدے کے لیے تیار ہے، تاہم واشنگٹن ایران کی جوہری صلاحیت کے حوالے سے ٹھوس رعایتیں چاہتا ہے۔

انہوں نے واضح کیا کہ امریکا صرف الفاظ پر نہیں بلکہ عملی اقدامات پر یقین رکھتا ہے اور ایران کو اپنے جوہری پروگرام کے حوالے سے قابلِ تصدیق اقدامات کرنا ہوں گے۔

دوسری جانب امریکا اور ایران کے درمیان جنگ کے خاتمے اور آبنائے ہرمز کو دوبارہ کھولنے کے لیے حالیہ ہفتوں میں تجاویز کا تبادلہ ہوا ہے، تاہم امریکی صدر ڈونلڈ ٹرمپ نے ایران کی تازہ پیشکش مسترد کردی ہے۔

جے ڈی وینس کے بیان سے واضح ہوتا ہے کہ واشنگٹن ایران کے ساتھ کسی بھی معاہدے کے لیے اس کے جوہری پروگرام میں عملی تبدیلی کو اہم شرط سمجھتا ہے