کوئٹہ میں نجی اسکولوں کی فیسوں میں مبینہ دگنا اضافہ، والدین پریشان

کوئٹہ: مختلف نجی اسکولوں کی جانب سے فیسوں میں مبینہ طور پر دگنا اضافہ کیے جانے کی شکایات سامنے آنے لگی ہیں، جس کے باعث والدین شدید مالی دباؤ کا شکار ہوگئے ہیں۔

والدین کا کہنا ہے کہ نجی اسکولوں کی فیسوں میں مسلسل اضافے کے باعث بچوں کی تعلیم کے اخراجات پورے کرنا مشکل ہوتا جارہا ہے۔ ان کے مطابق فیسوں میں اضافے کی نگرانی اور اسے ضابطے میں رکھنے کے لیے مؤثر نظام ہونا چاہیے۔

والدین نے سوال اٹھایا ہے کہ نجی تعلیمی اداروں کی جانب سے فیسوں میں ہونے والے اضافے کی نگرانی کون کرتا ہے اور کیا اس حوالے سے کوئی واضح ضابطہ موجود ہے۔

والدین نے وزیراعلیٰ بلوچستان سے مطالبہ کیا ہے کہ معاملے کا فوری نوٹس لیا جائے اور متعلقہ حکام کو نجی اسکولوں کی فیسوں کا جائزہ لینے کی ہدایت کی جائے۔

انہوں نے مطالبہ کیا کہ فیسوں میں مبینہ غیرضروری اضافے کی تحقیقات کی جائیں اور والدین کو ریلیف فراہم کرنے کے لیے مؤثر اقدامات کیے جائیں۔

والدین کا کہنا ہے کہ بچوں کی تعلیم کسی خاندان پر اضافی بوجھ نہیں بلکہ بنیادی ضرورت ہے، اس لیے نجی اسکولوں کی فیسوں میں اضافے کے معاملے پر مؤثر نگرانی اور واضح پالیسی ضروری ہے۔