گیس صارفین کیلئے بڑی خبر، یکساں ٹیرف لانے کا فیصلہ

اسلام آباد: حکومت نے یکم جولائی 2027 سے ملک بھر میں یکساں گیس ٹیرف نافذ کرنے کے لیے عالمی مالیاتی فنڈ (آئی ایم ایف) سے منظوری لینے کا فیصلہ کیا ہے۔

پیٹرولیم ڈویژن کے مطابق مجوزہ اصلاحات کے تحت موجودہ کراس سبسڈی کا نظام ختم کیا جائے گا، جبکہ کم آمدن والے گھرانوں کو ریلیف دینے کے لیے ہدفی مالی معاونت کا نظام متعارف کرایا جائے گا۔ اس مقصد کے لیے تقریباً 162 ارب روپے مختص کرنا ہوں گے۔

نئے نظام کے تحت گیس کے موجودہ 12 سلیب پر مشتمل ٹیرف نظام ختم کرنے کی تجویز ہے۔ اس کے بجائے مختلف صارفین کو بتدریج تقریباً 1,708 روپے فی ایم ایم بی ٹی یو کے یکساں اوسط ٹیرف کی جانب منتقل کیا جائے گا۔

حکومت کا کہنا ہے کہ مجوزہ اقدام کا مقصد گیس ٹیرف کے موجودہ نظام میں اصلاحات اور سبسڈی کو زیادہ ہدفی انداز میں فراہم کرنا ہے۔