گورنر راج لگانے کیلئے جتنے عناصر درکار ہوتے ہیں وہ کے پی حکومت مہیا کر چکی، اختیار ولی

اسلام آباد: وزیراعظم کے کوآرڈینیٹر برائے اطلاعات اختیار ولی نے کہا ہے کہ خیبرپختونخوا حکومت نے وہ تمام عناصر مہیا کردیئے ہیں جو ان کے بقول گورنر راج کے نفاذ کے لیے درکار ہوتے ہیں۔

جیو نیوز کے پروگرام میں گفتگو کرتے ہوئے اختیار ولی نے کہا کہ ایک وقت آئے گا جب صوبائی اسمبلی تحلیل ہوگی اور ملک کو وسط مدتی انتخابات کی طرف جانا پڑے گا، تاہم ان کے مطابق اس کے علاوہ بھی کئی آپشنز موجود ہیں۔

انہوں نے دعویٰ کیا کہ خیبرپختونخوا حکومت کی صورتحال گورنر راج کے حوالے سے درکار حالات پیدا کرچکی ہے۔

دوسری جانب تحریک انصاف خیبرپختونخوا کے ترجمان شوکت یوسفزئی نے کہا کہ گورنر راج اسی صورت میں نافذ کیا جاسکتا ہے جب آئینی مشینری کام کرنا بند کردے، جبکہ خیبرپختونخوا میں آئینی نظام معمول کے مطابق کام کررہا ہے۔

شوکت یوسفزئی کا کہنا تھا کہ تحریک انصاف حکومت کے ساتھ مذاکرات چاہتی ہے اور حکومت کو دستیاب چند دنوں سے فائدہ اٹھاتے ہوئے بات چیت کا راستہ اختیار کرنا چاہیے۔