سول اور فوجداری مقدمات بیک وقت چل سکتے ہیں، لاہور ہائیکورٹ نے قانونی نکتہ طے کر دیا

لاہور: لاہور ہائیکورٹ نے اراضی سے متعلق مبینہ جعلسازی اور فراڈ کیس میں اہم قانونی نکتہ واضح کرتے ہوئے قرار دیا ہے کہ کسی سول مقدمے کے زیرِ سماعت ہونے کی بنیاد پر فوجداری کارروائی ختم یا معطل نہیں کی جاسکتی۔

جسٹس محمد امجد پرویز نے اللہ وسایا کی درخواست پر 14 صفحات پر مشتمل فیصلہ جاری کیا۔ عدالت نے قرار دیا کہ سول اور فوجداری مقدمات بیک وقت جاری رہ سکتے ہیں، جبکہ محض سول تنازع کی موجودگی فوجداری کارروائی روکنے کے لیے کافی نہیں۔

عدالتی فیصلے کے مطابق اگر جعلسازی کا مبینہ جرم سول مقدمہ دائر ہونے سے پہلے ہوا ہو تو ایسی صورت میں دفعہ 195(1)(c) کا اطلاق نہیں ہوگا اور فوجداری مقدمہ قانون کے مطابق معمول کے طریقہ کار کے تحت آگے بڑھے گا۔

فیصلے میں مزید کہا گیا کہ تفتیش کے مرحلے پر فوجداری مقدمات میں ہائیکورٹ کی مداخلت کا بھی عمومی طور پر جواز نہیں بنتا۔