افغان سرزمین سے دہشتگردی کی ہر کوشش کا جواب دیا جائے گا، وزیر اطلاعات

اسلام آباد: وفاقی وزیر اطلاعات عطا اللہ تارڑ نے کہا ہے کہ پاکستان پرامن بقائے باہمی پر یقین رکھتا ہے، تاہم افغان سرزمین سے پاکستان میں دہشتگردی کی ہر کوشش کا بھرپور جواب دیا جائے گا۔

اسلام آباد میں انٹرنیشنل پارلیمنٹیرینز کانگریس سے گفتگو کرتے ہوئے عطا اللہ تارڑ نے کہا کہ امن ہی ترقی کا راستہ ہے، پاکستان امن کا خواہاں ہے لیکن اس خواہش کو کمزوری نہ سمجھا جائے۔

انہوں نے کہا کہ پاکستان کئی دہائیوں سے افغان شہریوں کی میزبانی کرتا آیا ہے، تاہم افغان عوام اور افغان حکومت کے نظریات میں فرق ہے۔ افغان عوام کو اپنے حقوق اور معاشی خوشحالی حاصل کرنے کا حق ہے۔

وفاقی وزیر اطلاعات نے کہا کہ افغانستان میں دہشتگردوں کے ٹھکانے موجود ہیں اور افغان حکومت کو دہشتگردی کے مائنڈ سیٹ سے نکلنا ہوگا۔ ان کے مطابق اگر دہشتگردی کی سوچ کے باعث افغان حکومت معاشی خوشحالی حاصل نہیں کر پاتی تو یہ افغان عوام کے ساتھ زیادتی ہوگی۔

عطا اللہ تارڑ کا کہنا تھا کہ افغانستان میں امن اسی صورت ممکن ہے جب افغان عبوری حکومت دہشتگردی کو ایک مسئلہ تسلیم کرے۔ انہوں نے کہا کہ افغان حکومت کو یہ بھی سمجھنا ہوگا کہ تعلیم کے بغیر کوئی معاشرہ ترقی نہیں کرسکتا۔

انہوں نے بتایا کہ قیام امن کے لیے پاکستان کی جانب سے وفود افغانستان بھیجے گئے ہیں۔ وفاقی وزیر نے واضح کیا کہ افغان سرزمین سے پاکستان میں ہونے والی دہشتگردی کا ماضی میں بھی جواب دیا گیا ہے اور آئندہ بھی ہر کوشش کا جواب دیا جائے گا۔