میر رضا کیس: جوڈیشل کمیشن کی مدت میں توسیع کا فیصلہ نہ ہو سکا

کراچی: میر رضا علی کے قتل کیس کی تحقیقات کے لیے قائم جوڈیشل کمیشن کی مدت ختم ہونے کے بعد کمیشن کی کارروائی 2 اکتوبر تک ملتوی کردی گئی۔

جسٹس عمر سیال کی سربراہی میں قائم کمیشن نے تحریری حکم نامہ جاری کرتے ہوئے کہا کہ کمیشن کی مدت 27 ستمبر کو ختم ہوچکی ہے۔ کمیشن کی جانب سے مدت میں 15 اکتوبر تک توسیع کی درخواست سندھ حکومت کو بھیجی گئی تھی۔

سندھ حکومت کے فوکل پرسن نے کمیشن کو آگاہ کیا کہ توسیع کی سمری وزیراعلیٰ سندھ نے منظور کرکے فیصلے کے لیے سندھ کابینہ کو ارسال کردی ہے۔

تحریری حکم نامے کے مطابق سندھ کابینہ کا اجلاس یکم اکتوبر کو متوقع ہے، جس کے پیش نظر کمیشن کی کارروائی 2 اکتوبر تک ملتوی کی گئی ہے۔

حکم نامے میں کہا گیا ہے کہ اگر سندھ کابینہ نے کمیشن کی مدت میں توسیع نہ کی تو مزید گواہان کو طلب نہیں کیا جائے گا اور اب تک ریکارڈ کیے گئے بیانات کی بنیاد پر رپورٹ جلد جمع کرائی جائے گی۔

اگر مدت میں توسیع منظور ہوگئی تو گواہان کو نئے نوٹس جاری کیے جائیں گے جبکہ 3 سینئر پولیس افسران کو بھی سوالنامے ارسال کیے جائیں گے۔