آبنائے ہرمز میں امریکی زیرِ آب ڈرون پکڑنے کا ایرانی دعویٰ، واشنگٹن نے مسترد کردیا

تہران: آبنائے ہرمز میں مبینہ امریکی زیرِ آب ڈرون کے معاملے پر ایران اور امریکا کے درمیان نیا تنازع سامنے آگیا ہے۔ ایران کے پاسداران انقلاب نے امریکی زیرِ آب ڈرون قبضے میں لینے کا دعویٰ کیا ہے، تاہم امریکی فوج نے اس دعوے کو مسترد کردیا۔

ایرانی پاسداران انقلاب کے مطابق ایرانی بحریہ نے ایک انٹیلی جنس کارروائی کے دوران امریکی بغیر پائلٹ زیرِ آب گاڑی یو ایس ریموس 600 کو اپنے قبضے میں لیا۔ ایرانی حکام کا کہنا ہے کہ ڈرون سے حاصل ہونے والے ڈیٹا کا ماہرین جائزہ لیں گے۔

دوسری جانب امریکی سینٹرل کمانڈ (سینٹ کام) نے ایران کے دعوے کی تردید کرتے ہوئے کہا ہے کہ امریکی فوج اپنے تمام آپریشنل ڈرون اثاثوں پر مکمل کنٹرول رکھتی ہے۔

سینٹ کام کے ترجمان کیپٹن ٹم ہاکنز نے بھی ایرانی دعوے کو مسترد کیا۔ یوں مبینہ زیرِ آب ڈرون کے معاملے پر دونوں ممالک کے مؤقف ایک دوسرے سے مختلف ہیں، جبکہ واقعے کی آزادانہ تصدیق تاحال سامنے نہیں آسکی۔