نوابزادہ میر جمال رئیسانی کی ٹانک اور ڈیرہ اسماعیل خان میں خودکش حملوں کی شدید مذمت

) پاکستان پیپلز پارٹی کے مرکزی رہنما و رکن قومی اسمبلی نوابزادہ میر جمال خان رئیسانی نے ٹانک اور ڈیرہ اسماعیل خان میں ہونے والے خودکش حملوں کی شدید مذمت کرتے ہوئے ڈیرہ اسماعیل خان دھماکے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔اپنے ایک بیان میں نوابزادہ میر جمال خان رئیسانی نے کہا کہ دہشتگردی کی بزدلانہ کارروائیاں قابل مذمت ہیں، قوم نے دہشتگردی کے خلاف جنگ میں بے شمار قربانیاں دی ہیں اور شہداءکی قربانیوں کو پوری قوم قدر و احترام کی نگاہ سے دیکھتی ہے۔انہوں نے کہا کہ ڈیرہ اسماعیل خان دھماکے میں جاں بحق ہونے والے افراد کے لواحقین کے غم میں برابر کے شریک ہیں اور ان سے دلی ہمدردی اور تعزیت کا اظہار کرتے ہیں۔ انہوں نے زخمیوں کی جلد صحتیابی کے لیے دعا بھی کی۔نوابزادہ میر جمال خان رئیسانی نے کہا کہ خیبرپختونخوا دہشتگردی کے خلاف جنگ میں فرنٹ لائن پر ہے، جہاں سیکیورٹی فورسز، قانون نافذ کرنے والے اداروں اور عوام نے امن کے قیام کے لیے بے شمار قربانیاں دی ہیں۔ خوارج کی بزدلانہ کارروائیاں دہشتگردی کے خلاف قوم کے عزم کو کمزور نہیں کرسکتیں۔انہوں نے کہا کہ دہشتگردی کے خاتمے کے لیے پوری قوم متحد ہے اور امن کے قیام کی جدوجہد میں شہداءکی قربانیاں ہمیشہ یاد رکھی جائیں گی۔ نوابزادہ میر جمال خان رئیسانی نے شہداءکے درجات کی بلندی، لواحقین کے لیے صبر جمیل اور زخمیوں کی جلد صحتیابی کے لیے دعا کی۔