کوئٹہ جاتے ہوئے کراچی کی فٹبال ٹیم مبینہ طور پر لٹ گئی

کوئٹہ: کوئٹہ میں جاری چیف منسٹر گولڈ کپ فٹبال ٹورنامنٹ میں شرکت کے لیے آنے والی کراچی کی فٹبال ٹیم کی بس کو مستونگ اور سریاب کے درمیان مبینہ طور پر مسلح ڈاکوؤں نے روک کر لوٹ لیا۔

رپورٹس کے مطابق درجن سے زائد مسلح افراد نے بس میں موجود کھلاڑیوں اور دیگر مسافروں کو تقریباً ایک گھنٹے تک یرغمال بنائے رکھا اور اس دوران ان سے نقد رقم اور موبائل فون چھین لیے۔

ذرائع کے مطابق واردات کے دوران بعض کھلاڑیوں اور مسافروں کو مبینہ طور پر تشدد کا بھی سامنا کرنا پڑا۔

واردات کے بعد مسلح افراد نے بس کو کوئٹہ جانے کی اجازت دے دی اور موقع سے فرار ہوگئے۔

واقعے کے بعد شہر سے شہر سفر کرنے والی کھیلوں کی ٹیموں اور عام مسافروں کی سیکیورٹی کے حوالے سے تشویش کا اظہار کیا جا رہا ہے۔

واقعے سے متعلق مزید تفصیلات اور ملزمان کی گرفتاری کے حوالے سے حکام کی جانب سے باضابطہ معلومات سامنے آنا باقی ہیں۔