مودی حکومت اپنے وعدوں سے مکر گئی، کاکروچ جنتا پارٹی نے دوبارہ بڑے مارچ کا اعلان کر دیا

نئی دہلی: بھارت میں NEET پیپر لیک تنازع ایک بار پھر شدت اختیار کرنے لگا ہے، جہاں احتجاجی تنظیم نے حکومت کی جانب سے کیے گئے وعدے پورے نہ ہونے پر دوبارہ بڑے احتجاجی مارچ کا اعلان کردیا ہے۔

رپورٹس کے مطابق کاکروچ جنتا پارٹی (CJP) نے 5 ستمبر کو نئی دہلی میں انڈیا گیٹ سے دہلی پولیس ہیڈکوارٹر تک پرامن مارچ کرنے کا اعلان کیا ہے۔ تنظیم کا کہنا ہے کہ جنتر منتر پر ہونے والے گزشتہ احتجاج کے بعد حکومت کی جانب سے دی گئی یقین دہانیوں پر تاحال عملدرآمد نہیں کیا گیا۔

CJP کے مطابق حکومت نے NEET پیپر لیک تنازع کے دوران جان گنوانے والے طلبہ کے اہل خانہ کو معاوضہ دینے اور احتجاج کرنے والے نوجوانوں کے خلاف درج مقدمات ختم کرنے کی یقین دہانی کرائی تھی، تاہم یہ مطالبات اب تک پورے نہیں ہوئے۔

تنظیم کا کہنا ہے کہ سپریم کورٹ کی جانب سے بھی مظاہرین کے خلاف درج مقدمات کی تفصیلات طلب کی گئی تھیں تاکہ معاملے پر کارروائی کی جاسکے، لیکن حکومتی سطح پر پیش رفت سست روی کا شکار ہے۔

اعلان کردہ مارچ کی قیادت مبینہ طور پر ان طلبہ کے اہل خانہ کریں گے جنہوں نے NEET تنازع کے دوران جانیں گنوائیں، جبکہ پولیس کارروائی کا سامنا کرنے والے طلبہ بھی احتجاج میں شریک ہوں گے۔

CJP نے واضح کیا ہے کہ احتجاج پرامن ہوگا، تاہم اگر حکومت نے وعدے پورے نہ کیے تو NEET پیپر لیک معاملے پر احتجاجی تحریک دوبارہ تیز کی جاسکتی ہے۔