سنسنی خیزی اور فیک نیوز میں بھارتی میڈیا سب سے آگے، امریکی سفیر

نئی دہلی: بھارت میں تعینات امریکی سفیر سرجیو گور نے بھارتی میڈیا کے اندازِ رپورٹنگ پر تنقید کرتے ہوئے کہا ہے کہ بھارتی میڈیا میں سنسنی خیزی اس حد تک بڑھ چکی ہے کہ خبر، تجزیے اور حقیقت کے درمیان فرق کرنا مشکل ہوگیا ہے۔

میڈیا رپورٹس کے مطابق امریکی سفیر نے بھارتی ٹاک شوز پر تبصرہ کرتے ہوئے کہا کہ بیک وقت کئی افراد کے چیخنے چلانے والے پروگرامز کو دیکھ کر سمجھنا مشکل ہوتا ہے کہ یہ نیوز شو ہے یا شور شرابا۔

انہوں نے سوال اٹھایا کہ بار بار مداخلت اور روکنے کے باوجود مہمانوں کو مسلسل چیخنے کی عادت کہاں سے آتی ہے۔ ان کا کہنا تھا کہ امریکا میں بھی فیک نیوز کو ایک بڑا مسئلہ سمجھا جاتا ہے، تاہم بھارتی میڈیا اس معاملے میں سب سے آگے نکل گیا ہے۔

سرجیو گور نے کہا کہ میڈیا کا بنیادی مقصد عوام تک درست معلومات پہنچانا ہونا چاہیے، لیکن سنسنی خیزی اور غیرمصدقہ معلومات سے صحافت کا معیار متاثر ہوتا ہے۔

دوسری جانب سیاسی مبصرین کا کہنا ہے کہ امریکی سفیر کے تبصرے نے بھارتی میڈیا میں بڑھتی ہوئی سنسنی خیزی، غیرمصدقہ دعوؤں اور یکطرفہ رپورٹنگ کے رجحان پر نئی بحث چھیڑ دی ہے۔ ان کے مطابق آزاد اور ذمہ دار صحافت کے لیے حقائق کی تصدیق اور متوازن رپورٹنگ انتہائی ضروری ہے۔