پاکستان کو جولائی میں 76 کروڑ 30 لاکھ ڈالر کی غیر ملکی اقتصادی معاونت موصول

اسلام آباد: پاکستان کو جولائی 2026 کے دوران غیر ملکی اقتصادی معاونت کی مد میں مجموعی طور پر 76 کروڑ 30 لاکھ ڈالر موصول ہوئے، جن میں قرضوں اور گرانٹس دونوں شامل ہیں۔

سرکاری دستاویزات کے مطابق موصول ہونے والی اقتصادی معاونت کا بڑا حصہ قرضوں پر مشتمل تھا۔ جولائی میں پاکستان کو 74 کروڑ 46 لاکھ 70 ہزار ڈالر قرض جبکہ ایک کروڑ 83 لاکھ 70 ہزار ڈالر گرانٹس کی صورت میں حاصل ہوئے۔

اعداد و شمار کے مطابق مجموعی غیر ملکی معاونت کا تقریباً 97 فیصد حصہ قرضوں پر مشتمل رہا، جس سے ظاہر ہوتا ہے کہ بیرونی مالی معاونت میں قرضوں کا کردار نمایاں ہے۔

دستاویز کے مطابق جولائی کے دوران چین کی جانب سے پاکستان کو 14 کروڑ 66 لاکھ 20 ہزار ڈالر کی اقتصادی معاونت فراہم کی گئی، جبکہ کثیر الجہتی مالیاتی اداروں اور دیگر ذرائع سے 25 کروڑ 28 لاکھ 30 ہزار ڈالر موصول ہوئے۔

رپورٹ کے مطابق بجٹ سپورٹ کے لیے پاکستان کو 34 کروڑ 39 لاکھ 90 ہزار ڈالر قرض حاصل ہوا، جبکہ غیر منصوبہ جاتی معاونت کی مد میں 43 کروڑ 27 لاکھ 30 ہزار ڈالر اور منصوبہ جاتی معاونت کے تحت 33 کروڑ 3 لاکھ ڈالر فراہم کیے گئے۔

اقتصادی ماہرین کے مطابق بیرونی مالی معاونت میں قرضوں کے بڑھتے ہوئے حجم کے باعث ضروری ہے کہ ان رقوم کو ترقیاتی منصوبوں، برآمدات میں اضافے اور معاشی استحکام کے لیے مؤثر انداز میں استعمال کیا جائے۔