کشمیر، 3 نوجوانوں کی گردن کٹی لاشیں نیلم ویلی کے جنگل سے برآمد

کشمیر، 3 نوجوانوں کی گردن کٹی لاشیں نیلم ویلی کے جنگل سے برآمد

مظفرآباد: آزاد جموں و کشمیر کے ضلع نیلم ویلی کے جاگراں جنگل سے 2 سگے بھائیوں سمیت 3 نوجوانوں کی لاشیں برآمد ہوئی ہیں، جن کے بارے میں بتایا گیا ہے کہ وہ دو ماہ سے زائد عرصے سے لاپتہ تھے۔

پولیس کے مطابق جاگراں جنگل کے ایک نالے سے ملنے والی لاشوں کی شناخت ناصر، یاسر اور فیصل کے نام سے ہوئی ہے۔ ناصر اور یاسر آپس میں سگے بھائی تھے۔

ورثا کے مطابق تینوں نوجوان 6 جون کو جڑی بوٹیاں تلاش کرنے کے لیے جاگراں جنگل گئے تھے، تاہم 7 جون کے بعد ان سے رابطہ منقطع ہوگیا تھا۔ ان کی گمشدگی کی رپورٹس متعلقہ تھانوں میں بھی درج کرائی گئی تھیں۔

اطلاع ملنے پر پولیس نے لاشوں کو تحویل میں لے کر پوسٹ مارٹم کے لیے اسپتال منتقل کردیا۔ ایس ایچ او وجاہت کاظمی کے مطابق واقعے کی تحقیقات جاری ہیں اور پولیس مختلف پہلوؤں کا جائزہ لے رہی ہے۔

پولیس کا کہنا ہے کہ پوسٹ مارٹم رپورٹ سامنے آنے کے بعد واقعے سے متعلق مزید حقائق سامنے آئیں گے، جبکہ شناخت کے بعد قانونی کارروائی بھی آگے بڑھائی جائے گی۔

واقعے کے بعد نیلم ویلی کے مقامی لوگوں میں تشویش پائی جاتی ہے، جبکہ پولیس کی جانب سے واقعے کی وجوہات اور نوجوانوں کی ہلاکت سے متعلق مزید تحقیقات جاری ہیں۔