وزارتِ اطلاعات نے خواجہ آصف سے منسوب بھارت سے متعلق ویڈیو کو فیک قرار دے دیا

وزارتِ اطلاعات نے خواجہ آصف سے منسوب بھارت سے متعلق ویڈیو کو فیک قرار دے دیا

اسلام آباد: وزارتِ اطلاعات و نشریات نے وفاقی وزیر دفاع خواجہ آصف سے منسوب سوشل میڈیا پر گردش کرنے والی ایک ویڈیو کو جعلی قرار دے دیا۔

وزارتِ اطلاعات کے مطابق مذکورہ ویڈیو مختلف سوشل میڈیا پلیٹ فارمز پر گردش کر رہی ہے، جس میں خواجہ آصف کو بظاہر پریس کانفرنس سے خطاب کرتے ہوئے دکھایا گیا ہے، تاہم ویڈیو میں موجود بیان ان سے منسوب کیا گیا ہے۔

جعلی ویڈیو میں خواجہ آصف سے منسوب کیا گیا کہ پاکستان اور بھارت نے ایک ہی وقت میں آزادی حاصل کی، تاہم دونوں ممالک کی ترقی میں واضح فرق ہے۔ ویڈیو میں بلوچستان، خیبر پختونخوا اور آزاد کشمیر کی صورتحال سے متعلق بھی مختلف بیانات ان سے منسوب کیے گئے ہیں۔

ویڈیو میں بھارت کی ٹیکنالوجی، انفرا اسٹرکچر اور معاشی ترقی کا حوالہ دیتے ہوئے بھی خواجہ آصف سے مبینہ طور پر ایسے بیانات منسوب کیے گئے جو انہوں نے حقیقت میں نہیں دیے۔

وزارتِ اطلاعات نے شہریوں کو خبردار کرتے ہوئے کہا ہے کہ کسی بھی خبر یا ویڈیو کو شیئر کرنے سے قبل اسے سرکاری اور آفیشل ذرائع سے لازمی طور پر ویری فائی کیا جائے۔