ماں کے دودھ کی اہمیت و افادیت کے حوالے سے اوستامحمد میں آگاہی مہم جاری

ماں کے دودھ کی اہمیت و افادیت کے حوالے سے اوستامحمد میں آگاہی مہم جاری

اوستامحمد(نمائندہ خصوصی)ماں کے دودھ کی اہمیت، افادیت اور نومولود بچوں کی بہتر صحت و نشوونما کے حوالے سے ماہِ اگست میں ملک بھر کی طرح ضلع اوستامحمد میں بھی خصوصی آگاہی مہم جاری ہے۔ اس سلسلے میں محکمہ صحت بلوچستان، بلوچستان نیوٹریشن اور یونیسیف کے تعاون سے مختلف سطحوں پر والدین اور عوام کو ماں کے دودھ کے فوائد سے آگاہ کیا جا رہا ہے۔سردار یار محمد جمالی میموریل ہسپتال اوستامحمد میں ڈسٹرکٹ کوآرڈینیشن نیوٹریشن پروگرام کے تحت آگاہی سرگرمیوں کا انعقاد کیا جا رہا ہے، جس کی نگرانی ڈسٹرکٹ کوآرڈینیٹر نیوٹریشن پروگرام شوکت علی جتوئی کر رہے ہیں۔ آگاہی مہم کے دوران والدین، ماؤں اور ضلع اوستامحمد کے عوام کو ماں کے دودھ کی اہمیت، نومولود بچوں کی صحت مند نشوونما اور ابتدائی عمر میں مناسب غذائیت کے حوالے سے ضروری معلومات فراہم کی جا رہی ہیں۔ماہرینِ صحت کے مطابق ماں کا دودھ بچے کے لیے قدرتی اور بہترین غذا ہے، جو بچے کی جسمانی و ذہنی نشوونما میں اہم کردار ادا کرتا ہے اور مختلف بیماریوں سے بچاؤ کے لیے بچے کے مدافعتی نظام کو مضبوط بنانے میں مددگار ثابت ہوتا ہے۔ ماں کے دودھ سے متعلق درست معلومات اور شعور کی فراہمی سے نومولود بچوں کی صحت کو بہتر بنانے کے ساتھ ساتھ غذائی قلت کے مسائل پر بھی قابو پانے میں مدد مل سکتی ہے۔اس موقع پر محکمہ صحت بلوچستان، بلوچستان نیوٹریشن اور یونیسیف کی جانب سے والدین پر زور دیا گیا کہ وہ ماں کے دودھ کی اہمیت کو سمجھیں اور صحت مند معاشرے کے قیام کے لیے آگاہی پیغام کو اپنے خاندانوں اور معاشرے کے دیگر افراد تک بھی پہنچائیں۔
ڈسٹرکٹ کوآرڈینیشن نیوٹریشن پروگرام کے تحت جاری اس مہم کا مقصد عوام میں ماں کے دودھ اور بچوں کی غذائیت سے متعلق شعور اجاگر کرنا اور صحت مند نسل کی تشکیل کے لیے والدین کو ضروری رہنمائی فراہم کرنا ہے