مسلم باغ پولیس کی بڑی کارروائی، فائرنگ کے تبادلے کے بعد 4 رکنی ڈکیت گینگ گرفتار

مسلم باغ پولیس کی بڑی کارروائی، فائرنگ کے تبادلے کے بعد 4 رکنی ڈکیت گینگ گرفتار

مسلم باغ: قلعہ سیف اللہ پولیس نے تھانہ مسلم باغ کی حدود میں جرائم پیشہ عناصر کے خلاف کارروائی کرتے ہوئے فائرنگ کے تبادلے کے بعد 4 رکنی مبینہ خطرناک ڈکیت گینگ کو گرفتار کرلیا۔

پولیس کے مطابق کارروائی ایس پی قلعہ سیف اللہ عمران رازق کی خصوصی ہدایت پر ڈی ایس پی مسلم باغ حاجی محمد زمری کی نگرانی میں ایس آئی/ایس ایچ او محمد اسماعیل بابر، آئی پی عبداللہ کاکڑ اور پولیس ٹیم نے کی۔

پولیس نے گرفتار ملزمان کی شناخت مرزا خان ولد اللہ داد، محمد صادق ولد عبدالخالق، نجیب اللہ ولد محمد دین اور محمد آصف ولد محمد کے ناموں سے کی ہے۔

پولیس کے مطابق گرفتار ملزمان کے قبضے سے ایک کلاشنکوف، دو ٹی ٹی پستول، وارداتوں میں استعمال ہونے والی فورنر گاڑی، متعدد مشکوک و مبینہ جعلی نمبر پلیٹس اور مبینہ جعلی کرنسی برآمد کی گئی۔

پولیس کا کہنا ہے کہ گرفتار ملزمان ڈکیتی، چوری اور دیگر سنگین وارداتوں میں ملوث اور مطلوب تھے۔ ملزمان کے خلاف تھانہ مسلم باغ میں مقدمات درج کرکے مزید تفتیش شروع کردی گئی ہے۔

پولیس کے مطابق کارروائی کے دوران اہلکاروں اور ملزمان کے درمیان فائرنگ کا تبادلہ بھی ہوا۔ مسلم باغ پولیس کی کارروائی کو شہریوں نے سراہتے ہوئے جرائم پیشہ عناصر کے خلاف مزید مؤثر اقدامات کا مطالبہ کیا ہے۔