مقتدرہ نے حکومت سے صوبوں کے معاملے پر گفتگو نہیں کی، رانا ثنااللہ

اسلام آباد: وزیراعظم کے مشیر رانا ثنااللہ نے کہا ہے کہ مقتدرہ کی جانب سے حکومت کے ساتھ نئے صوبوں کے قیام کے معاملے پر تاحال کوئی گفتگو نہیں ہوئی، جبکہ یہ معاملہ ابھی کابینہ یا پارلیمنٹ میں بھی زیرِ بحث نہیں آیا۔

نجی ٹی وی پروگرام میں گفتگو کرتے ہوئے رانا ثنااللہ نے کہا کہ جو وفاقی وزرا نئے صوبوں کے قیام کی بات کر رہے ہیں، انہیں چاہیے کہ اس حوالے سے کوئی واضح اور تحریری فارمولا سامنے لائیں۔ صرف بیانات یا پوڈکاسٹ میں بات کرنے سے نئے صوبے قائم نہیں ہوسکتے۔

انہوں نے کہا کہ نئے صوبوں کے حوالے سے اب تک کوئی باقاعدہ منصوبہ تیار نہیں کیا گیا۔ کوئی 12، کوئی 20 اور کوئی 32 صوبوں کی بات کر رہا ہے، لیکن اس کے لیے واضح منصوبہ اور عملی طریقہ کار ضروری ہے۔

رانا ثنااللہ کے مطابق مصطفیٰ کمال کا مؤقف کراچی تک محدود ہے، جبکہ عوامی سطح پر نئے صوبوں کے حوالے سے کوئی بڑی مقبول تحریک موجود نہیں۔ ان کے مطابق صوبہ ہزارہ کے علاوہ کسی علاقے میں عوام کی جانب سے واضح مطالبہ سامنے نہیں آیا۔

انہوں نے کہا کہ مسلم لیگ ن کی اعلیٰ قیادت نے بھی حالیہ دنوں میں نئے صوبوں کے حوالے سے کوئی فیصلہ یا اعلان نہیں کیا۔ حکومت کی بنیادی ترجیح یہ ہے کہ عام آدمی کے مسائل اس کی دہلیز پر حل کیے جائیں۔