پیٹرولیم لیوی کیخلاف جماعت اسلامی آج چاروں صوبوں میں دھرنے دے گی

کراچی: جماعت اسلامی نے پیٹرولیم لیوی کم نہ کرنے اور پیٹرولیم مصنوعات کی قیمتوں میں اضافے کے خلاف آج ملک کے چاروں صوبوں میں دھرنوں کا اعلان کردیا۔

جماعت اسلامی کے مطابق کراچی، پشاور اور کوئٹہ میں گورنر ہاؤسز کے باہر جبکہ لاہور میں وزیر اعلیٰ ہاؤس کے باہر احتجاجی دھرنے دیے جائیں گے۔ دھرنوں کا آغاز سہ پہر تین بجے ہوگا۔

ذرائع کے مطابق کراچی میں دھرنے کا 15 روزہ شیڈول بھی تیار کرلیا گیا ہے۔ جماعت اسلامی کے امیر حافظ نعیم الرحمان نے کہا ہے کہ یہ احتجاج عوام کے حقوق کے لیے ہے اور پیٹرولیم مصنوعات کی قیمتوں میں اضافے کے باعث مہنگائی میں اضافہ ہو رہا ہے۔

انہوں نے کہا کہ جماعت اسلامی کا مطالبہ ہے کہ پیٹرولیم لیوی ختم کی جائے اور عوام کو ریلیف فراہم کیا جائے۔ ان کا کہنا تھا کہ ملک بھر میں عوامی احتجاج جاری رہے گا۔