قطر کا ایرانی پائلٹس کو حراست میں رکھنے سے انکار، ایک پائلٹ کی باقیات مل گئیں

دوحہ: قطر نے ایرانی پائلٹس کو حراست میں رکھنے کی خبروں کو مسترد کرتے ہوئے کہا ہے کہ معاملہ فضائی حدود کی خلاف ورزی اور اس کے بعد پیش آنے والے واقعے سے متعلق ہے۔

قطری وزارت خارجہ کے مطابق رواں سال کے آغاز میں ایرانی پائلٹس نے قطری فضائی حدود میں داخل ہونے کے بعد حکام کی جانب سے رابطے کی کوششوں کا جواب نہیں دیا تھا۔

خبر رساں ادارے کے مطابق قطری تلاش اور امدادی ٹیموں کو ایک ایرانی پائلٹ کی باقیات ملی ہیں، جس کے بعد ایرانی حکام سے رابطہ کیا گیا تاکہ باقیات کی حوالگی کے طریقہ کار پر تعاون کیا جا سکے۔

قطر نے ایران کو واقعے سے متعلق کارروائیوں کی تفصیلات کا جائزہ لینے کی دعوت بھی دی ہے، تاہم ایران کی جانب سے تاحال جواب نہیں دیا گیا۔

قطری حکام کا کہنا ہے کہ ایرانی پائلٹس کو حراست میں رکھنے کا دعویٰ درست نہیں، جبکہ واقعے کی مزید تفصیلات تاحال سامنے نہیں آ سکیں۔