پاکستان کے معدنی شعبے میں نئی پیش رفت، ایس آئی ایف سی کی معاونت سے خضدار منصوبہ فعال

کوئٹہ: ایس آئی ایف سی کی سہولت کاری سے پاکستان کے معدنی شعبے میں سرمایہ کاری اور ترقی کے عمل میں اہم پیش رفت سامنے آئی ہے، جس کے تحت خضدار کا بارائٹ، لیڈ اور زنک (بی ایل زیڈ) منصوبہ فعال ہوگیا ہے۔

خضدار میں واقع بی ایل زیڈ منصوبہ پاکستان کے اہم معدنی منصوبوں میں شامل ہے، جس میں 69 ملین ٹن معدنی ذخائر موجود ہیں جبکہ منصوبے کی متوقع مائن لائف 34 سال ہے۔

ایس آئی ایف سی نے منصوبے کو درپیش دیرینہ مسائل کے حل میں معاونت فراہم کرتے ہوئے 200 ملین ڈالر کی سرمایہ کاری کی راہ ہموار کی۔ یہ منصوبہ پاکستان پیٹرولیم لمیٹڈ اور بولان مائننگ انٹرپرائزز کے اشتراک سے تیار کیا جا رہا ہے۔

ذرائع کے مطابق لیز سے متعلق مسائل کے حل اور آپریشنل معاہدے کی تکمیل کے بعد منصوبے میں نمایاں پیش رفت ہوئی ہے۔ منصوبے سے سالانہ 150 سے 230 ملین ڈالر تک آمدن اور بلوچستان میں معاشی سرگرمیوں میں اضافے کی توقع ظاہر کی جا رہی ہے۔

ماہرین کے مطابق پاکستان کے معدنی وسائل میں سرمایہ کاری کے بڑھتے مواقع عالمی سرمایہ کاروں کے اعتماد میں اضافے اور ملکی معیشت کو مضبوط بنانے میں اہم کردار ادا کر سکتے ہیں۔