امریکا ایران جنگ بندی میں پاکستان کا اہم کردار، عالمی سطح پر سفارتی کوششوں کا اعتراف

امریکا ایران جنگ بندی میں پاکستان کا اہم کردار، عالمی سطح پر سفارتی کوششوں کا اعتراف

امریکا اور ایران کے درمیان جنگ بندی کے لیے پاکستان کی سفارتی کوششوں کو عالمی سطح پر سراہا جا رہا ہے، جس کے باعث خطے میں پاکستان کے سفارتی اور اسٹریٹجک کردار پر توجہ بڑھ گئی ہے۔

عالمی جریدے ساؤتھ ایشین وائسز کے مطابق امریکا اور ایران کے درمیان کشیدگی کم کرنے کے لیے پاکستان اور قطر بھرپور سفارتی کوششیں کر رہے ہیں۔ رپورٹ میں کہا گیا کہ پاکستان اپنی سفارتی صلاحیت کے ذریعے دونوں ممالک کو مذاکرات کی میز پر لانے میں اہم کردار ادا کر سکتا ہے۔

جریدے کے مطابق امریکا کے ساتھ دفاعی و اسٹریٹجک شراکت داری اور ایران کے ساتھ تاریخی تعلقات پاکستان کو ایک منفرد سفارتی مقام فراہم کرتے ہیں۔ رپورٹ میں پاک فوج کے سربراہ فیلڈ مارشل سید عاصم منیر کی جنگ بندی کے لیے سفارتی کوششوں کا بھی ذکر کیا گیا ہے۔

ساؤتھ ایشین وائسز کے مطابق پاکستان اور قطر جولائی میں ایران اور امریکا کے درمیان جنگ بندی اور آبنائے ہرمز کی بحالی کے لیے مشترکہ تجاویز پیش کر چکے ہیں۔ رپورٹ میں دونوں ممالک کو درپیش معاشی اور فوجی دباؤ کو بھی مذاکرات کی اہم وجہ قرار دیا گیا ہے۔

جریدے نے مزید کہا کہ امریکا، ایران، سعودی عرب اور چین کے ساتھ پاکستان کے تعلقات اسے قابلِ اعتماد ثالث بناتے ہیں۔ ماضی میں بھی پاکستان نے امریکا اور چین کے درمیان سفارتی روابط قائم کرانے سمیت خطے کے اہم تنازعات میں سفارتی کردار ادا کیا ہے۔

رپورٹ کے مطابق امریکا ایران تنازع سمیت اہم عالمی معاملات میں پاکستان کی ثالثی اور امن کوششوں کے اعتراف سے ملک کی سفارتی اہمیت اور عالمی وقار میں مزید اضافہ ہوا ہے۔