سپریم کورٹ کو نیب کیسز سننے کا اختیار نہیں، عدالت عظمیٰ کا بڑا فیصلہ

 سینیٹ کی قائمہ کمیٹی برائے اطلاعات و نشریات کی ذیلی کمیٹی کے اجلاس میں کنوینر سینیٹر سرمد علی نے نیشنل سائبر کرائم انویسٹی گیشن ایجنسی (NCCIA) کو ہدایت کی کہ وہ اخبارات، ان کی ویب سائٹس، ڈیجیٹل ایڈیشنز اور ٹی وی چینلز پر شائع یا نشر ہونے والے مواد کے خلاف کسی قسم کی کارروائی نہ کرے۔

اجلاس میں سینیٹر سرمد علی نے کہا کہ پرنٹ میڈیا، اخبارات اور ان کے ڈیجیٹل ایڈیشنز سے متعلق شکایات پریس کونسل آف پاکستان (PCP) کے دائرہ اختیار میں آتی ہیں، جبکہ الیکٹرانک میڈیا اور ٹی وی چینلز سے متعلق معاملات پاکستان الیکٹرانک میڈیا ریگولیٹری اتھارٹی (PEMRA) کے تحت نمٹائے جاتے ہیں۔

اجلاس کے شرکاء کو یاد دلایا گیا کہ پیکا (PECA) قانون کی منظوری کے وقت حکومت نے یقین دہانی کرائی تھی کہ روایتی میڈیا اور اس کے ڈیجیٹل پلیٹ فارمز کے خلاف اس قانون کے تحت کارروائی نہیں کی جائے گی۔ کمیٹی نے ایک شکایت کنندہ گروپ کو بھی ہدایت کی کہ وہ اپنی شکایت متعلقہ فورم یعنی پریس کونسل آف پاکستان میں لے جائے۔

اجلاس میں ایک اخبار میں شائع ہونے والے متنازع کالم اور سوشل میڈیا پر اس کے پھیلاؤ سے متعلق بھی گفتگو ہوئی۔ این سی سی آئی اے حکام نے بتایا کہ متعلقہ اخبار نے اپنے پرنٹ اور ویب ایڈیشن سے کالم حذف کر دیا ہے، تاہم اس کا مواد اب بھی سوشل میڈیا پر موجود ہے۔

اس موقع پر سینیٹر پرویز رشید نے کہا کہ اگر اخبار نے متنازع کالم ہٹا دیا ہے تو اس کا مطلب ہے کہ غلطی کی اصلاح کر دی گئی ہے، لہٰذا اس معاملے کو مزید آگے بڑھانے یا اخبار اور صحافی کے خلاف پیکا کے تحت کارروائی کی ضرورت نہیں۔

اجلاس میں سینیٹر جان محمد بلیدی نے بلوچستان اور سندھ کے علاقائی اخبارات کو درپیش معاشی مشکلات کا معاملہ بھی اٹھایا۔ انہوں نے کہا کہ علاقائی اخبارات شدید مالی بحران کا شکار ہیں، اس لیے حکومت انہیں زیادہ سے زیادہ سرکاری اشتہارات اور دیگر سہولیات فراہم کرے تاکہ ان کا کاروبار مستحکم ہو اور وہ اپنی صحافتی خدمات جاری رکھ سکیں۔