بلوچستان کا مسئلہ سیاسی ہے،سید امان شاہ

بلوچستان کا مسئلہ سیاسی ہے،سید امان شاہ
اضلاع میں ردوبدل اور طاقت کے استعمال سے مسائل حل نہیں ہوں گے، عوام پاکستان پارٹی بلوچستان
وفاق تمام سیاسی قوتوں کو اعتماد میں لے کر پائیدار سیاسی حل کی راہ ہموار کرے، صوبائی صدر
کوئٹہ: عوام پاکستان پارٹی بلوچستان کے صوبائی صدر سید امان شاہ نے اپنے ایک بیان میں کہا ہے کہ بلوچستان کا مسئلہ بنیادی طور پر ایک سیاسی مسئلہ ہے، جس کا دیرپا اور قابل قبول حل صرف سنجیدہ، بامقصد اور نتیجہ خیز سیاسی مکالمے کے ذریعے ہی ممکن ہے۔ انہوں نے کہا کہ ماضی کے تجربات اس حقیقت کو واضح کرتے ہیں کہ طاقت کے استعمال، انتظامی فیصلوں یا اضلاع میں ردوبدل سے مسائل کا مستقل حل نہیں نکالا جا سکتا، بلکہ اس سے عوام میں مزید بے چینی اور احساسِ محرومی جنم لیتا ہے۔ انہوں نے کہا کہ بلوچستان کے عوام اپنے آئینی، جمہوری اور معاشی حقوق کے خواہاں ہیں، جنہیں تسلیم کرنا ریاست کی ذمہ داری ہے۔ عوام پاکستان پارٹی کا مؤقف ہمیشہ سے یہ رہا ہے کہ بلوچستان کے مسائل کو طاقت کی بجائے سیاسی بصیرت، باہمی اعتماد اور قومی اتفاقِ رائے کے ذریعے حل کیا جانا چاہیے۔ سید امان شاہ نے کہا کہ وفاقی حکومت، تمام متعلقہ اداروں اور سیاسی قیادت کو چاہیے کہ وہ بلوچستان کی تمام سیاسی، سماجی، قبائلی اور مذہبی قیادت کو اعتماد میں لے کر ایک جامع سیاسی مکالمے کا آغاز کریں تاکہ پائیدار امن، ترقی اور استحکام کی بنیاد رکھی جا سکے۔انہوں نے کہا کہ بلوچستان میں ترقیاتی منصوبوں کے ساتھ ساتھ عوام کو روزگار، معیاری تعلیم، صحت، بنیادی سہولیات اور انصاف کی فراہمی کو بھی یقینی بنایا جائے، کیونکہ حقیقی ترقی صرف سڑکوں اور عمارتوں سے نہیں بلکہ عوام کی خوشحالی، اعتماد اور شراکت داری سے ممکن ہوتی ہے۔ انہوں نے کہا کہ عوام پاکستان پارٹی بلوچستان ہمیشہ آئین، جمہوریت، قومی یکجہتی اور پرامن سیاسی جدوجہد پر یقین رکھتی ہے اور تمام قومی مسائل کے حل کے لیے مذاکرات، برداشت اور باہمی احترام کو ناگزیر سمجھتی ہے۔ سید امان شاہ نے اس امید کا اظہار کیا کہ تمام اسٹیک ہولڈرز قومی مفاد کو مقدم رکھتے ہوئے بلوچستان کے مسئلے کے مستقل، منصفانہ اور سیاسی حل کے لیے مثبت کردار ادا کریں گے، تاکہ صوبے میں امن، خوشحالی اور ترقی کا ایک نیا دور شروع ہو سکے۔