ایران کے خلاف جنگ میں دو ہفتوں کے دوران تقریباً 100 امریکی فوجی زخمی ہوئے، پینٹاگون کی تصدیق

واشنگٹن: امریکی محکمہ دفاع (پینٹاگون) نے تصدیق کی ہے کہ ایران کے خلاف جاری فوجی کارروائیوں کے دوران گزشتہ دو ہفتوں میں تقریباً 100 امریکی فوجی زخمی ہوئے ہیں۔

پینٹاگون کے ترجمان شان پارنیل نے بتایا کہ 7 جولائی سے اب تک مختلف حملوں اور فوجی سرگرمیوں کے نتیجے میں تقریباً 100 امریکی اہلکار زخمی ہوئے، جنہیں مختلف نوعیت کی چوٹیں آئیں۔

انہوں نے کہا کہ زخمی ہونے والے فوجیوں میں سے 96 فیصد علاج کے بعد دوبارہ اپنی ڈیوٹی پر واپس آ چکے ہیں، جبکہ دیگر اہلکاروں کا علاج جاری ہے۔

پینٹاگون نے اس سے قبل بتایا تھا کہ 28 فروری سے اب تک ایران سے متعلق فوجی کارروائیوں اور حملوں میں 14 امریکی فوجی ہلاک جبکہ 427 اہلکار زخمی ہو چکے ہیں۔

امریکی میڈیا کے مطابق عراق اور اردن میں امریکی فوجی اڈوں پر ہونے والے حملوں کے بعد ہلاکتوں کی تعداد میں مزید اضافے کا خدشہ ظاہر کیا جا رہا ہے۔ اردن میں حملے کے مقام سے ملنے والے بعض ناقابلِ شناخت انسانی اعضا کا فرانزک جائزہ بھی لیا جا رہا ہے۔

امریکی حکام کے مطابق خطے میں بڑھتی ہوئی کشیدگی کے باعث امریکی فوج کو مسلسل خطرات کا سامنا ہے، جبکہ ایران اور امریکا کے درمیان جاری تنازع مزید پیچیدہ ہوتا جا رہا ہے۔