پی پی ایچ آئی نصیرآباد میں مبینہ جعلی تعلیمی اسناد پر بھرتیوں کے الزامات، شفاف تحقیقات کا مطالبہ

نصیر آباد (رپورٹ محمد یونس عمرانی) پی پی ایچ آئی نصیرآباد میں بعض ملازمین کی تعلیمی اسناد کے حوالے سے سنگین الزامات سامنے آئے ہیں۔ ذرائع کے مطابق چند اسناد کی صداقت پر سوالات اٹھائے جا رہے ہیں، جس کے بعد معاملے کی شفاف اور غیر جانبدارانہ تحقیقات کا مطالبہ زور پکڑ گیا ہے۔ذرائع کا کہنا ہے کہ متعلقہ سرٹیفکیٹس اور تعلیمی ریکارڈ کی جانچ پڑتال کے لیے متعلقہ اداروں سے تصدیق کرائی جانی چاہیے تاکہ یہ واضح ہو سکے کہ بھرتیاں تمام قانونی تقاضوں کے مطابق کی گئی تھیں یا نہیں۔شہری، سماجی اور عوامی حلقوں نے حکومت بلوچستان، محکمہ صحت، پی پی ایچ آئی ڈپٹی کمشنر نصیر آباد کمشنر نصیر آباد اور دیگر متعلقہ اداروں سے مطالبہ کیا ہے کہ تمام مشتبہ اسناد کی فوری فرانزک اور ادارہ جاتی تصدیق کرائی جائے۔اگر کسی ملازم کی تعلیمی اسناد غیر مستند یا جعلی ثابت ہوں تو ذمہ دار افراد کے خلاف قانون کے مطابق کارروائی عمل میں لائی جائے، جبکہ حقائق عوام کے سامنے لائے جائیں۔پی پی ایچ آئی انتظامیہ کا مؤقف خبر فائل ہونے تک موصول نہیں ہو سکا۔ مؤقف موصول ہونے کی صورت میں اسے بھی خبر کا حصہ بنایا جائے گا۔