شہید عاصم کی جرات اور ایثار قوم کیلئے مشعلِ راہ ہے، غزالہ گولہ

کوئٹہ (یو این اے )ڈپٹی اسپیکر بلوچستان اسمبلی غزالہ گولہ نے خاتون کی جان بچاتے ہوئے جامِ شہادت نوش کرنے والے گروپ کیپٹن عاصم کو پوری قوم کا ہیرو قرار دیتے ہوئے کہا ہے کہ ان کی بے مثال جرات، فرض شناسی، ایثار اور وطن سے محبت ہمیشہ قوم کے دلوں میں زندہ رہے گی۔ انہوں نے کہا کہ ایسے بہادر سپوت قوم کا سرمایہ ہوتے ہیں جو اپنی جانوں کا نذرانہ پیش کر کے انسانیت، فرض اور وطن سے وفاداری کی اعلی مثال قائم کرتے ہیں منگل کے روز اپنے تعزیتی بیان میں غزالہ گولہ نے گروپ کیپٹن عاصم کی شہادت پر گہرے رنج و غم کا اظہار کرتے ہوئے کہا کہ انہوں نے ایک بے گناہ خاتون کی جان بچانے کے لیے اپنی جان قربان کر کے غیر معمولی بہادری، انسانی ہمدردی اور پیشہ ورانہ ذمہ داری کا مظاہرہ کیا۔ ان کا یہ عظیم جذبہ ہمیشہ یاد رکھا جائے گا اور آنے والی نسلوں کے لیے مشعلِ راہ ثابت ہوگاڈپٹی اسپیکر بلوچستان اسمبلی نے کہا کہ قوم اپنے ان بہادر بیٹوں پر فخر کرتی ہے جو دوسروں کی جان بچانے کے لیے اپنی جانوں کی قربانی دینے سے بھی دریغ نہیں کرتے۔ گروپ کیپٹن عاصم نے جس جذب ایثار اور بہادری کا مظاہرہ کیا، وہ اس بات کا ثبوت ہے کہ پاکستان کے محافظ ہر مشکل گھڑی میں عوام کے تحفظ کو اپنی اولین ذمہ داری سمجھتے ہیں۔غزالہ گولہ نے کہا کہ شہدا کی قربانیاں کسی بھی قوم کا قیمتی سرمایہ ہوتی ہیں اور انہی قربانیوں کی بدولت قومیں محفوظ، مضبوط اور باوقار بنتی ہیں۔ انہوں نے کہا کہ گروپ کیپٹن عاصم کی لازوال قربانی کو ہمیشہ عزت و احترام کے ساتھ یاد رکھا جائے گا اور پوری قوم ان کے اہل خانہ کے غم میں برابر کی شریک ہے انہوں نے شہید کے اہل خانہ سے دلی تعزیت اور ہمدردی کا اظہار کرتے ہوئے کہا کہ اس دکھ کی گھڑی میں بلوچستان اسمبلی اور صوبے کے عوام سوگوار خاندان کے ساتھ کھڑے ہیں۔ انہوں نے دعا کی کہ اللہ تعالی شہید گروپ کیپٹن عاصم کو جنت الفردوس میں اعلی مقام عطا فرمائے، ان کی قربانی کو اپنی بارگاہ میں شرفِ قبولیت بخشے اور پسماندگان کو یہ عظیم صدمہ صبر و استقامت کے ساتھ برداشت کرنے کی توفیق عطا فرمائے ڈپٹی اسپیکر بلوچستان اسمبلی نے کہا کہ وطن کے لیے جانوں کا نذرانہ پیش کرنے والے شہدا پوری قوم کا فخر ہیں اور ان کی قربانیوں کو کبھی فراموش نہیں کیا جا سکتا۔ انہوں نے اس عزم کا اظہار کیا کہ قوم اپنے شہدا کی قربانیوں کو ہمیشہ قدر کی نگاہ سے دیکھے گی اور ان کے اہل خانہ کی عزت و تکریم کو یقینی بنانے کے لیے ہر ممکن تعاون جاری رکھا جائے گا غزالہ گولہ نے اپنے بیان کے اختتام پر کہا کہ گروپ کیپٹن عاصم کی بہادری، فرض شناسی اور انسانیت کے لیے دی گئی قربانی ہمیشہ تاریخ کا روشن باب رہے گی اور پوری قوم انہیں ایک سچے محب وطن، نڈر سپاہی اور قومی ہیرو کے طور پر یاد رکھے گی۔