شہری کی درخواست پر وزیراعلیٰ بلوچستان کی فوری کارروائی، ملزمان گرفتار

کوئٹہ: معاون وزیر اعلیٰ بلوچستان شاہد رند نے کہا ہے کہ وزیر اعلیٰ بلوچستان میر سرفراز بگٹی نے کوئٹہ کے ایک شہری کی درخواست پر فوری کارروائی کا حکم دیتے ہوئے پولیس کو متحرک کیا، جس کے نتیجے میں ملوث ملزمان کو گرفتار کر لیا گیا۔

شاہد رند کے مطابق جناح ٹاؤن کوئٹہ کے رہائشی رفاقت علی نے لین دین کے معاملات میں بعض افراد پر دھوکہ دہی کا الزام عائد کرتے ہوئے اپنی جان کو خطرہ لاحق ہونے کی نشاندہی کی تھی۔ وزیر اعلیٰ کی ہدایت پر اسٹاف افسر سید امین نے متاثرہ شہری سے رابطہ کیا اور مکمل تعاون، داد رسی اور شنوائی کی یقین دہانی کرائی۔

معاون وزیر اعلیٰ نے بتایا کہ وزیر اعلیٰ بلوچستان کے حکم پر پولیس نے کارروائی کرتے ہوئے ملوث ملزمان کو گرفتار کر کے تفتیش شروع کر دی ہے۔

درخواست گزار رفاقت علی نے وزیر اعلیٰ بلوچستان میر سرفراز بگٹی کا شکریہ ادا کرتے ہوئے کہا کہ فوری داد رسی اور شنوائی پر وہ حکومت بلوچستان کے مشکور ہیں۔ انہوں نے سوشل میڈیا پر جاری اپنے پیغام میں کارروائی کو عوامی مسائل کے حل کی جانب مثبت قدم قرار دیا۔